न्हूदँ हनेत केन्द्रीय स्तरया समितिया माग

श्रीकृष्ण महर्जन

नेपाल संवतयात राष्ट्रिय संवतया मान्यता बिइ धुंकाः नेपाल संवतया आन्दोलनया आः वयाः सांस्कृतिक उत्सवया रुपय् जक हनाः यंकाच्वन धकाः मनूतय्सं मधाःगु मखु । अय्नं नेवाःतय्सं न्हूदँया लसताय् भिंतुना जुलुस पिकायेगु ज्या नेवाःतय्सं थाय् थासय् थःथःगु कथं हे यानाः वयाच्वंगु दु । अथे थःथःगु तालं न्हूदँ हनाच्वंगु ज्याझ्वःयात समन्वय याइगु केन्द्रीय स्तरया निकाय मदयाः धाःसा समस्या ब्वलनाच्वंगु दु ।

येँया नेपालभाषा मंकाः खलकं छगू न्हूदँ समारोह समिति दयेकेगु अले बसन्तपुरय् याइगु ज्याझ्वलय् प्रधानमन्त्रीयात मूपाहां यायेगु यानाः वयाच्वंगु दु । उगु ज्याझ्वलय् येँ महानगरया छुं छुं वडाया जक जूगु नापं येँय् हे थाय् थासय् ब्यागलं ब्यागलं कथंया भिंतुना जुलुस जुयाच्वंगुलिं हे केन्द्रीय स्तरया निकाय माःगु महसूस यानाहःगु खः । येँया नेपालभाषा मंकाः खलः न्हूदँ समारोह समिति ११३१ या नायः विपेन्द्र महर्जनं छुं छुं कथं न्हूदँया ज्याझ्वःया नितिं थःपिन्सं समन्वय यानाः वयाच्वनागु दु धकाः न्ह्यथसें 'न्हूदँयात आन्दोलनया रुपय् यंकेगु नितिं समन्वय याइगु निकाय आवश्यकता खनेदु' धयादिल ।

अथे हे यलय् थुगुसी न्हूदँया सांस्कृतिक जुलुस पिकायेगु नितिं समन्वय यायेगु भाला काःगु स्वंगू संगठन मध्ये ज्यापु समाज यलया न्हापांम्ह न्वकु मंगल महर्जनं धयादिल न्हूदँयात आन्दोलया रुपय् हनेमाः उकिया नितिं समन्वय याइगु केन्द्रीय स्तरया निकाय मदयाः समस्या ब्वलनाच्वंगु उिकं समन्वय याइगु निकायमाः । उगु हे कथं न्हूदँ ग्वसाः खलः ११३१ थिमिया कजि कृष्ण मोहन जोशीं धयादिल, न्हूदँया नितिं फुक्क नेवाःतय् थीथी ज्याझ्वःया समन्वय याइगु निकाय मदयेकं हे मगाः । अथे हे येँया पश्चिम लागाय् न्हूदँया ज्याझ्वः यानाः वयाच्वंगु 'पश्चिम लागा नेवाः पुचः'या नायः शान्तप्रकाश श्रेष्ठं धयादिल 'गुलि नं न्हूदँ समारोह समितित दयेकी गन गन ज्याझ्वः याइ अन अन च्वंपिं मनूत दुथ्याका केन्द्रीय स्तरया समिति दयेका व हे समितिपाखें मनूत ज्याझ्वलय् प्रतिनिधिमुलक कथं छ्वयेमाः ।'

किपूया नेपाल संवत् ११३१ न्हूदँ हना ग्वसाः खलःया कजि ज्ञानबहादुर महर्जनं धयादिल 'न्हूदँ हनेगु नितिं समन्वय याइगु निकाय कन्द्रीय स्तरया मदयाः समस्या जुयाच्वंगु दु न्हूदँ आन्दोलनयात नं परम्परागत सांस्कृतिक नखः हने थें यानाः वयाच्वंगु दु उकिं आःया अवस्थाय् बिचाः यायेमाःगु ई वःगु दु ।' अथे हे बांलाःगु लागाय् न्हूदँ हनाः वयाच्वंगु मू ग्वसाः खलः तिमिला खलःया कार्यवाहक नायः महेश्वर मानन्धरं धयादिल 'न्हूदँया नितिं केन्द्रीय स्तरया समन्वय समिति मदया समस्या जुयाच्वंगु दु सरोकारवालातय्सं बिचाः यायेमाः ।' उगु हे कथं गोकर्ण लागाय् न्हूदँ हनेगु नितिं ग्वसाः खलः दयेकेगु तयारी जुयाच्वंगु दुसा उकिया नितिं सक्रिय जुयादीम्ह गंगाराम श्रेष्ठं नं न्हूदँ तःजिक हनेगु नितिं केन्द्रीय स्तरया समन्वय समिति दत धाःसा बांलाइ ।

अथे हे च्वबाहाः क्वय्ना लागाय् न्हूदँ ज्याझ्वः ग्वसाः ग्वइगु खलः पुचः मध्ये सर्वदलिय समितिया कजि इन्द्र बहादुर महर्जनं धयादिल न्हूदँ हनेगु नितिं आःया अवस्थाय् आधिकारीक केन्द्रीय निकाय मदया समस्या ब्वलंगु दु उिकं थ्व नाप सरोकारवालातय्सं याकनं हे केन्द्रीय स्तरया निकाय दयेकमाः । थथे थाय् थासय्यापिन्सं अथे न्हूदँ हनेगु नितिं केन्द्रीय निकाय माल धकाः तायेकाच्वंगु अवस्थाय् नं नेवाःतय्गु आधिकारीक राष्ट्रिय संगठन नेवाः देय् दबू छाय् सुंक च्वनाच्वन धकाः न्ह्यसः ब्वलनीगु स्वाभाविक हे खः ।