अनिश्चितकालीन तालाबन्दीया कारण परिषद्या ज्याय् पंगः

ख्वप (झीगु स्वनिगः)

वंगु असोज १२ गतेया मन्त्रिपरिषद् बैठकया निर्णयकथं सरकारं नियुक्ति याःपिं न्वकु व दुजः छ्याञ्जेयात कार्यकक्षय् दुमकायेगु यानाः अनिश्चितकालीन तालाबन्दीया कारण उच्च माध्यमिक शिक्षा परिषद्य् महत्वपूर्ण ज्या दिनाच्वंगु जानकारी ब्यूगु दु ।

सरकारं वइगु प्यदँया नितिं परिषद्या न्वकु डा. हेमकुमार मिश्र व दुजः - छ्याञ्जेसं भीमलाल गुरुङयात नियुक्त यायेवं वंगु असोज १६ गते एकीकृत नेकपा माओवादी निकट नेपाल राष्ट्रिय कर्मचारी सङ्गठन अखिल क्रान्तिकारी व अखिल नेपाल शिक्षक सङ्गठनं संयुक्तरुपं अनिश्तिकालीन तालाबन्दी याःगु खः ।

कामचलाउ सरकारं याःगु निर्णय मान्य मजुइगु धासें याःगु तालाबन्दी मंगलवाःतक्क नं मचायेवं परिषद्य् वंगु असोज १८ गतेनिसें हाजिर जूपिं न्वकु व दुजः - छ्याञ्जे थःगु कार्यकक्ष नापं दुहाँ वनेखंगु मदुनि । वःसांनिसें हे न्वकु लिसे दुजः - छ्याञ्जे परिषद्या सभाहलय् च्वनेगु यानाच्वंगु कर्मचारीलिसे सभाहलय् हे च्वनाः ज्या यायेगु यानाच्वंगु न्वकु डा. मिश्रं धयादिल ।

तालाबन्दीया कारण थःगु कार्यकक्षय् च्वनाः ज्या यायेमखंगु गोप्य लिसे महत्वपूर्ण निर्णय यायेमखंगु व पदाधिकारीयात समस्या जूगु वय्कलं जानकारी बियादीगु खः । असोज १२ गते सरकारं सच्छि व प्यंगू निर्णय याःगु तर माओवादीयात परिषद्य् नियुक्ति यायेगु निर्णय जक मुख्य मजुल धायेगु व सम्बन्धित थासय् मवंसे परिषद्य् तालाबन्दी यायेगु उमिगु स्वार्थ जूगु वय्कलं धयादिल ।
परिषद्या दुजः - छ्याञ्जे गुरुङं तालाबन्दीया कारण वःसानिसें हे कार्यकक्षय् च्वनाः ज्या याये मखंगुलिं ज्या यायेत निश्चित थाय् मदुगु जानकारी नापं बियादीगु खः ।
सभाहलय् च्वनाः हाजिर यानाः थीथी महाशाखाय् वनाः च्वनेगु यानाच्वंगुलिं माःगु ज्याया नितिं न्वकु व दुजः - छ्याञ्जेयात क्वथाय् क्वथाय् माला जुइमाःगु समस्या
नापं वःगु खँय् कर्मचारीपिंसं च्यूताः प्वंकूगु दु ।

शिक्षामन्त्री सर्वेन्द्रनाथ शुक्लां छ्याञ्जेलिसे वार्ता यायेगु धाःसां नं तालाबन्दी याइगु पुचलं मन्त्री बाहेक मेपिंलिसे वार्ता मयायेगु शर्त तःगु तर मन्त्रीं उिपंलिसे थः वार्ताय् मच्वनेगु अडान कायेवं वार्ता जुइमफुगु श्रोतं जानकारी ब्यूगु दु ।