फ्रान्सय् ओलीयात हाकुगु ध्वाँय्
येँ (झीगु स्वनिगः)
देशय् जुइगु अग्रगमनया पंगः कथं म्हसीका दुम्ह नेकपा एमालेया जिम्मेवार नेता ओली थः तिरिमय्जु नापं फ्रान्सय् वनाच्वंगु इलय् अनया नेपाःमिपिंसं विरोध कथं हाकुगु कापः क्यना विरोध याःगु दु ।
देय्या राजनीति लथालिङग यायेगु नितिं भूमिका म्हितूगु द्वपं ब्यूसें न्यकलं विरोध जुयाच्वंगु इलय् विदेश वंम्ह ओलीयात फ्रान्सय् च्वंपिं नेपाःमिपिंसं थथे विरोध याःगु खः । अमेरिका व युरोपया भ्रमणय् वनाच्वंम्ह नेता ओलीयात पेरिसय् च्वंगु नागरिक समाजया प्रतिनिधिपिंसं हाकुगु ध्वाँय् कथं ल्हातय् व छ्योनय् हाकुगु कापः चिनाः विरोध याःगु खः ।
अथेला ओलीया फुक्क धइथें भ्रमणयात शंकास्पदकथं कायेगु यानाच्वंगु दु । देय् गम्भीर संकटं न्ह्योने वनाच्वंगु इलय् गोप्य कथं अथे विदेश वनीगु दुने छुं खँ दुगु विश्लेषक पिनिगु धापू दु । छुं ई न्ह्यो जक बेल्जियमय् गुपचुप कथं च्वनाच्वंगु इलय् हतियारया नितिं लिवंग याःगु धइगु नं अनुमान यानाच्वंगु दु ।
वंगु अक्टोबर ४ य् प्रुान्सय् च्वंगु राजदूत निवासय् थ्यंम्ह ओलीयात फ्रान्सय् च्वंपि नेपालीतय्सं विरोध पत्र लःल्हायेगु कुतः नं याःगु खः । तर उगु इलय् सम्भव मजुइवं हाकनं अक्टोबर २३ तारिख खुन्हु प्रुान्सय् च्वंपि नेपाली नागरिक समाजं हाकुगु ध्वाँय् क्यनाः विरोध याःगु खः । ओली अनया नेपाःमिपिंत २-४ न्हिंया नितिं धकाः धायेगु याःसां तबि स्ववाः न्ह्योनिसें च्वनाच्वंम्ह ओलीं नागरिक समाजया दुजः पिंत असभ्य नेपाःमिपिं धकाः तं क्यनेगु लिसे ब्वह ब्यूगु खः ।
नेता ओली व फ्रान्सया नागरिक समाजया प्रतिनिधि दथुइ फ्रान्सय् च्वंगु राजदूत निवासय् वादविवाद जुइवं राजदूत मोहन कृष्ण श्रेष्ठ स्वजक स्वयाच्वंगु खः । गबलें आक्रोशित व गबले ख्युंख्वाः तःम्ह नेता ओली नागरिक प्रतिनिधिया खँ स्वयां तःसलं हालाः विरोध पत्र ब्यूवःिपंत आक्रमण याःगु खः ।
विरोध पत्र विइगु झ्वलय् विवाद अप्वयेवं दूताबासं ब्यूगु तुच्चा नापं केपी ओलीलिसे च्वनाः मनेगु धाःसें विरोध पत्र बियाः नेपाःमिपिं लिहाँवःगु खः । उगु बहिष्कार ज्याझ्वलय् नेपाली गृहया नायः हेमन्त उपाध्याय एन आर एन प्रुान्सया मू-छ्याञ्जे हरी सापकोटा नेपाली एकता समाजया मू-छ्याञ्जे प्रमोद पाण्डे फ्रान्सया ब्यापारी बिनोद ओझा कविन्द्र कायस्थ रेभा उपाध्याय अनुराधा पौडेल लगायतिपंस ब्वति काःगु खः ।
