सुकुम्बासीपिंत जग्गाधनी लालपुर्जा

दाङ (झीगु स्वनिगः)

दाङया करिब सच्छि व झिंन्याम्ह सुकुम्बासीं कात्तिक मसान्तदुने हे जग्गाधनी लालपुर्जा दइगु जूगु दु ।
सुकुम्बासी समस्या समाधान जिल्ला समिति दाङं थ्वहे कात्तिक मसान्ततक्क जिल्लाया सच्छि व झिंन्याम्ह सुकुम्बासीपिंत लालपुर्जा बितरण याइगु जूगु दु ।

समितिं जग्गाधनी लालपुर्जा बितरणया नितिं न्हापांगु खुसिइ प्रकाशित याःगु सूचकथं दाङया करिब न्हय्सः सुकुम्वासीं निवेदन ब्यूगु खः । उगु निवेदनतदथुइ छानबिन यानाः करिब सच्छि व झिंन्याम्हसित जक न्हापांगु चरणय् जग्गाधनी लालपुर्जा बिइत्यंगु सुकुम्वासी समस्या समाधान जिल्ला समिति दाङया नायः गोविन्दबहादुर केकें जानकारी बियादीगु दु ।

वय्कःयाकथं न्हापांगु चरणय् जग्गाधनी प्रमाणपत्र दइगु सुकुम्वासीया बसोबास याःगु जग्गाया अस्थायी लालपुर्जा दयेमाःगु फिल्डबुक प्लट लिसे नक्साया कित्ता तयार जूगु जुइमाःगु व न्हापा हे समितिं निर्णय याःगु तर तिरो चलय् मजूगु जुइमाः ।

उमित जग्गाधनी प्रमाणपत्र बितरण यायेबलय् शहरी क्षेत्र जूसा झिंन्यागू धुर स्वयाः म्हो व ग्रामीण क्षेत्रय् न्यागू निसें झिगू कट्ठातक्क जग्गा दुगु प्रमाणपत्र बिइ ।

जग्गाधनी प्रमाणपत्र बितरणया ज्या लिपांगु चरणय् थ्यंसां नं संसदपाखें बजेट पारित मजूगुलिं समितिं ज्या न्ह्यःने न्ह्याकेफुगु मदुनि । समितियात सच्छि व झिंन्याम्ह सुकुम्वासी बसोवास याःगु थाय्या जग्गा अवलोकनया नितिं करिव स्वीद्वः तका जक माःगु दु । तर स्वीद्वः तका धेबा नं मुंकेमफयाः असोजदुने क्वचायेके माःगु ज्या आःतक्क नं जुइफुगु मदुनि ।

ज्या सुचारु यायेत जिल्ला विकास समितिं नं बजेट मब्यूगुलिं ऋण मालाः जूसां नं कात्तिक मसान्ततक्क सुकुम्बासीतय्त लालपुर्जा बिरतण याइगु समितिया नायः केकें जानकारी बियादिल ।

More Stories Like this