हानं भ्रष्ट न्यायाधीशया खँ

पुनरावेदन अदालतया भ्रष्ट न्यायाधीशया तेजबहादुर कार्कीयात निलम्बन याःगु लिपा हानं छम्ह मेम्ह भ्रष्ट न्यायाधीशयात न्याय परिषद् निलम्बनय् छ्वःगु दु । पुनरावेदन अदालत पोखराया न्यायाधीश ओमप्रकाश सुवेदीयात कार्यक्षमताया अभाव बांमलाःगु चरित्र व कर्तव्य पालनय् लापर्वाहीया द्वपं बियाः सुवेदीयात निलम्बन याःगु खः ।

सुवेदीया आचरणं न्याय व्यवस्थाय् लाःगु नकारात्मक प्रभावयात सीकेत सर्वोच्च अदालतया न्यायाधीश तपबहादुर मगरया अध्यक्षताय् छगू अध्ययन समिति गठन यानाः निलायादुने प्रतिवेदन पेश याइगु जूगु दु ।
न्यायाधीश सुवेदी वंगु लच्छि न्ह्यःनिसें अदालत वंगु मदु । सभासद्पिंत संविधानसभाया तप्यंक खुल्लारुपं सभासद् धायेमज्यू धकाः द्वपं बीगु ज्या याःगु दु । पेशागत मर्यादा विपरित मिसानाप नाजायज स्वापू तःगु प्रशासनिक नेतृत्वय् निराशाजनक खनेदुगु लगायत द्वपंया आधारय् अनुसन्धान न्ह्याकेगु ज्या जुइत्यंगु दु ।

वर्तमान न्याय व्यवस्था पूर्णत असफल जुइधुंकूगु दु । अन्याय याईपंत अवसर बीगु व गरिब जनतायात दुःख व सास्ति बीगु नेपाःया न्याय प्रणालीकथं थाय् कायेधुंकूगु दु । थुज्वःगु अवस्थाय् थौंया न्याय व्यवस्थाय् कानूनी राज्यया परिकल्पना यायेगु व्यर्थ खः । नेपाःया कानूनी प्रकि्रया व व्यवस्थां नेपाली जनता वाक्क दिक्क जुइधुंकूगु दु धायेत भ्याः हे थाकुइ मखु ।

दासढुंङ्गा हत्याकाण्डनिसें नारायणहिति हत्याकाण्ड अले साचार उद्योगी जमिम शाहया हत्यांनिसें कयाः सामान्य अपराधिक घटनाय् नं आरोपित व्यक्तित सामान्य धरौटीइ त्वःनेगु यानाच्वंम्ह सरकारं नेपाःया कानूनी व्यवस्थायात कया सन्तोषया खँ ल्हायेगु सम्भव मदु ।
थुज्वःगु इलय् कानूनी राज्यया खँ ल्हायेगु धयागु हे ख्याः यायेगु विषयवस्तु थें जुइधुंकूगु दु । कानून खनाः अपराधीत मखु अपराधीत खनाः कानून सुलुइगु व बिसुंवनेगु अःखःगु लकसया विकास जुयाच्वंगु स्पष्ट जुइ ।

उिकं कानूनी राज्यया अवधारणा आः यथास्थितिइ लागू जुइगु छुं हे आधारत मल्यने धुंकूगु दु । वर्तमान कानूनी प्रकि्रया व व्यवस्थाय् तःधंगु हिउपाः हयेमाःगु दु । सर्वोच्च अदालत निसें फुक्क अदालतत आः भ्रष्टाचारया केन्द्र जुइधुंकूगु दु । न्ह्यात्थेंयाःगु गम्भीर अपराध याःसां १०-२० लाखं याउँक मुक्त जुइफैगु गलत धारणां थाय् कायेधुंकूगु दु । कानून व अदालत कमजोर जुइधुंकूया हे कारणं देय्न्यंक दण्डहिनता अप्वयाः वनाच्वंगु दु । प्यख्यरं हिंसा व हत्याया आतंक न्यनाच्वंगु दु । थुज्वःगु अवस्थाय् न्याय व्यवस्थाय् हिउपाः महल धाःसा पुलांगु कानूनी प्रक्रियां न्याय व्यवस्था प्रति व संविधानप्रति जनताया विश्वास हे म्हो जुइगु बाहेक अप्वइ मखु ।

देश हिउपाःया दथुं न्ह्यानाच्वंगु अवस्थाय् फुक्क क्षेत्रय् परिवर्तनया माग जुइगु स्वभाविक खः । न्हूगु संविधान वइगु इलय् संविधानया व्याख्या सर्वोच्चपाखें जुइफै मखु । न्ह्याक्को हे स्वतन्त्र धाःसां न्याय व्यवस्था राजनीतिक अपराधितय्गु खेलौनाया विषयवस्तुं मुक्त यायेगु धयागु हे कानूनी संरचनायात जनप्रतिनिधि मातहतय् हयेगु खः । कानून दयेकीगु व्यवस्थापिका संसद्यात हे जवाफदेही यायेगु बुद्धिमानी जुइ ।

More Stories Like this