१३ क्वः नं बांमलाक्क पराजित
येँ (झीगु स्वनिगः)
व्यवस्थापिका संसदय् न्हूम्ह प्रधानमन्त्रीया नितिं याकःचा उम्मेदवार जुयाः नं नेपाली कांग्रेसया नेता रामचन्द्र पौडेल म्हिगः मंगलवाः नं बांमलाक्क हे पराजित जूगु दु ।
झिंस्वक्वःगु चुनावय् नेपाली कांग्रेसया हे फुक्क सांसदतय्सं मत ब्यूगु खने मन्त । कांग्रेसया हे ११४ म्ह सांसदत दुगु खःसा पौडेलया पक्षय् मुक्कं यानाः ९८ मत जक वल । २ मत विपक्षय् वंगु खःसा ४४ म्ह सांसदत तटस्थ च्वंगु खः ।
मंगलवाःया चुनावय् मुक्कं यानाः १४४ म्ह सांसदय्सं जक ब्वति काःगु खःसा पौडेलं उम्मेदवारी लितकयाः न्हूगु हे प्रक्रियाया माध्यमं प्रधानमन्त्री ल्वायेमाः धकाः दुईतिहाई बहुमतसिबें अप्वः सांसद्तय्सं चुनावी प्रकि्रयायात हे बहिस्कार याःगु खः ।
म्हिगःया चुनावय् नं एकीकृत नेकपा माओवादी नेकपा एमाले नेपाः राष्ट्रिय पार्टी नेपाल मजदुर किसान पार्टी नापं बहुमत दलतपाखें उगु चुनावी प्रकि्रयायात न्हापा थें हे बहिस्कार याःगु खः ।
एकीकृत माओवादी व एमालेया मत जक छथाय् तल धाःसां संसदय् बहुमत दुगु जुयाः कांग्रेसयात समस्या जुयाच्वंगु दु । थौंकन्हय् ५९९ म्ह सांसदत दु । याकःचा उम्मेदवार कांग्रेसया नेता रामचन्द्र पौडेलं चुनावय् त्याकेगु खःसा ३०१ मत आवश्यकता दु । थ्व हे ल्याखं वनाच्वन धाःसा गबलें नं पौडेल त्याइगु अवस्था मदु अय्नं उम्मेदवारी लित काःगु मदुनि ।
