सहमतिं जक बजेट: सभामुख
येँ (सन्ध्या टाइम्स)/बजेट पेश यायेगु निंतिं तिथिमिति क्वःछीत सरकारं इनाप यानाच्वंगु इलय् संसदया सभामुख सुवास नेम्वाङं राजनीतिक सहमति यानाः जक बजेट हयेत कामचलाउ सरकारया प्रधानमन्त्री माधव नेपालयात सुझाव बियादीगु दु ।
थौं सुथय् प्रधानमन्त्री नेपालयात नापलासें सभामुख नेम्वाङं उगु सुझाब बियादीगु खः। प्रधानमन्त्री निवास वालुवाटारय् जूगु सहलहया झ्वलय् वय्कलं पूर्ण बजेट हये मफुगुलिं संकटपूर्ण अवस्थां न्ह्याः वनाच्वंगुलिं सरकार प्रमुखया हैसियतं याकनं हे सहमति मालेत प्रधानमन्त्रीयात इनाप नं यानादिल ।
संसदया प्रमुख प्रतिपक्षी एकीकृत माओवादीं कामचलाउ सरकारं बजेट हये दइ मखु धयाच्वंगु इलय् सभामुख नेम्वाङं माओवादीयात माने यानाः जक बजेट हयेत बः बियादीगु खः। वय्कलं बजेट हये मफयाः ब्वलंगु समस्यायात बुँदागत रुपं थःत बिल धाःसा बजेट पेश यायेगु तिथिमिति बारे संसदया कार्यव्यवस्था समितिइ सहलह ब्याका बी धकाः नं प्रधानमन्त्रीयात जनाउ बियादीगु खः ।
उगु इलय् पूर्ण बजेट, राजनीतिक गतिरोध अन्त्य, संविधान निर्माण नापं मेमेगु खँय् नं सहलह जूगु खःसा सभामुख नेम्वाङं प्रधानमन्त्री चयनया अर्थहीन निर्वाचनं मुलुकयात अझ अप्वः अन्यौलय् यंकाच्वंगुलिं अन्तरिम संविधान संशोधन यानाः जूसां सहमति कायम यायेमाः धयादीगु खः ।
