"सरकारी लेटरप्याडय् नेपाल संवत् छ्य"

नेपालभाषा मंकाः खलः न्हूदँ समारोह समिति-११३१ पाखें म्हिगः प्रधानमन्त्री माधव नेपालयात छगू ज्ञापनपत्र लःल्हासें आवंलि सरकारी भ्वँतय् नं नेपाल संवत् उल्लेख यायेत इनाप यात। न्हूदँ समारोह समिति ११३१ या न्हूम्ह नायः विपेन्द्र महर्जनं उगु ज्ञापनपत्र लःल्हानादीगु खः। ज्ञापनपत्रय् सरकारी लेटर प्याडय् नेपाल संवत् छ्यलेगु धकाः उच्चस्तरीय निर्णय जूसां आःतकं उकथं मजूगु, न्हूदँबलय् क्यालेण्डरय् सार्वजनिक रुपं न्हूदँया लसताय् विदा धकाः उल्लेख याये माःगु, आः वइगु कार्त्तिक २२ गते किजा पुजा कुन्हु नं विदा बीमाःगु व पञ्चाङ्ग निर्णायक समितिं औंसीकुन्हु नववर्ष धकाः पात्रोय् उल्लेख यानातःगुयात प्रतिपदा कुन्हु न्हूदँ हनीगु जुयाः न्हूदँ प्रतिपदा कुन्हु हे उल्लेख जुइमाःगु खँ न्ह्यथनातःगु दु।
ज्ञापनपत्र लःल्हाना कयादिसें प्रधानमन्त्री नेपालं उगु खँय् सहमति जुइगु आश्वासन बियादीगु खः। लिसें वय्कलं संस्कृति व परम्परायात न्हूगु ढंगं यंकेमाःगु बिचाः नं प्वंकादिल ।

प्रम कार्यालय सिंहदरबारय् वंगु उगु डेलिगेसनय् न्हूदँ समारोह समितिया छ्याञ्जे नरेशवीर शाक्यलिसें समितिया दुजःपिं व न्हूदँ समारोह समितिया पुलांपिं नायःपिं सभासद् डा. मंगलसिद्धि मानन्धर, सभासद् तिर्थराम डंगोल, सभासद् बुद्ध साय्मि, इमेज च्यानलया आरके मानन्धर, चेम्बर अफ कमर्सया नायः सुरेन्द्रवीर मालाकार नापं मेपिनि नं उपस्थिति दुगु खः ।