समस्याया मार्क्सवादी समाधान

कृष्ण प्रजापति

ताः ई न्ह्यवंनिसें देशय् न्हूम्ह प्रधानमन्त्री ल्यायेगु खँय् जुयाच्वंगु मतदान बिना अर्थ फुनाच्वंगु दु। थ्व इलय् सचेत वर्गं राजनीतिक निर्णय बीपिं थीथी राजनीतिक कार्यकर्ता व नेतातय्त हे उचित सल्लाह व सुझावत बियाः देशयात थासय् हयेगु मस्वत धाःसा झन जक थ्व समस्यां ज्या मछिंकाच्वनीगु खने दयावःगु दु। थन उचित रुपं समस्याया समाधान मालेगु झ्वलय् ब्यावहारिक व सैद्धान्तिक धरातलयय् लिधनाः समाधान लुइकेगु छुं उपायत माले। प्रजातान्त्रिक व वामपन्थीतय् दथुइ थीथी कथंया समस्या ब्वलनाः देश इकिधिकि हे सने मफुगु थ्व इलय् थन समस्या समाधानया लागिं छुं मार्क्सवादी विचारयात छकः न्ह्यब्वये। वास्तवय् देश व जनताया सेवा यायेगु हे मार्क्सवाद खः। मार्क्सवादया थीथी बुँदाय् दुहाँ वनाः बहस यायेगु स्वयां छु यात धाःसा देश व जनताया हीत जुइ धकाः बहस यायेगु पाय्छि जुइ ।

न्हापां नेपाली जनतायाके राजनीति प्रति वितृष्णा ब्वलना वयाच्वंगु कारणत छकः मालेमाः थें च्वं। नेपाली राजनेतात झन भन तःमि जूपिं तःमि तुं जुयावनीगु व नये त्वनेगु तकं समस्या दुपि नेपाली जनता न्हि खानाः न्हि नयेमाःगु स्थितिया तकं समाधान याये मफइगु अवस्था वयेवं देशय् राजनीति प्रति जनताया वितृष्णा ब्वलनीगु स्वाभाविक हे खः। थज्याःगु जनजीविका लिसे सम्बन्धित समस्याया अध्ययन व अनुसन्धान यायेगु हे वास्तवय् मार्क्सवाद खः। अझ उकिया उचित समाधान लुइकाः उकियात ब्यवहारय् लागू याना वने फत धाःसा सामान्य जनतां थुइकीगु मार्क्सवाद नं व हे जुइफु। नये त्वने मखंपिंत नये त्वने खंकेगु, उचित सुख सुविधापूर्ण जीवन निर्वाह याये मखनाच्वंपिं मनूतय्त उचित ढंगया जीवन निर्वाह याकेगु दर्शनया नां खः मार्क्सवाद। उकिं नं सत्ता, पद व चुनावय् तक्यनाच्वंगु थ्व इलय् जनतायात थुइगु ढंगया समस्याया समाधान यायेगु थीथी उपायत मालेगु व लागू यायेगु हे मार्क्सवाद जू वनेफु ।

कम्युनिष्ट सिद्धान्त ब्वंपिं व उकिया उचित ढंगया ब्याख्या यायेफुपिं गुलिं विद्वानत हे देश व जनताया सेवा यायेगु स्वयां थःगु पद सुरक्षित यायेगु व थःपिनि पार्टीयात सत्ताय् टिके याना तयेगु स्वार्थं प्रेरित जुयाः ज्या याइपिं जुयाः वास्तवय् मार्क्सवाद खतं नःगु बिचाः जूवंगु खः। मार्क्सवाद छु खः धइगु थुइकाः थुकिया सैद्धान्तिक पक्षय् संघर्ष न्ह्याकाच्वनेगु बांलाःगु पक्ष खः। तर थः सत्ताय् वनेगु निंतिं सिद्धान्तयात हे बरः तयाः वा जनताया सेवायात हे हाचांगायेगु उचित उपाय धाःसा मखु। पार्टीया नेतृत्व याइपिंसं कोरा सिद्धान्तय् जक मखु कि सामाजिक व आर्थिक विकासया खँय् नं नाप नापं हे विचाः याना वनेमाःगु खनेदु। पुँजीवादी बन्दोबस्तया कारणं गुलिं कमजोर राजनीतिक धरातलय् ब्वलना वःपिं जुयाः राजनीतिक कार्यकर्तातय्त पलायन जुइत बाध्य जुयाच्वंगु जक मखु कि उमिगु आस्था व विश्वासयात हे न्यायेगु तकं यानाच्वंगु दु। हरेक मनुखं थःत समस्या जुइगु इलय् समास्यां मुक्त जुइ फइगु कथंया समाधान मालाच्वनी। अज्याःगु इलय् राजनीतिक कार्यकर्ता स्वयम हे न्ह्यचिलाः समस्या ज्यंका बीफत धाःसा वयात कुशल राजनीतिक कार्यकर्ता वा समाजसेवी कथं नं मनूतय्सं म्हसीका यंकी। समाज छम्हेसिनं मेम्हेसित ग्वाहालि यायेगु भावनां हे सञ्चालन जुयाच्वंगु दइ ।

दुःख व सुखया खँ नाप नापं यंकेगु स्वइपिंसं व जनताया सुख दुःख लिसें उलि हे भ्यलेपुने सःपिंसं वास्तवय् समस्या खनाः बिसिउँ जुइमखु। राजनीतिक नेता कार्यकर्तातय्सं बीगु थीथी समस्या समाधानया उपाय व सैद्धान्तिक ब्याख्यात ब्यावहारिक व उचित जुइमाः। थन थीथी राजनीतिक दलतय् दथुइ थःपिं हे जक सत्ताय् थ्यंकेगु, मेपिंत वास्ता हे मयायेगु कथंया खँ वयाच्वंगु दु। अथे जुयाः गुलिं समस्या समाधान याये धकाः वयाच्वंपिं मनूत समाधान यायेगु पलेसा थःहे पलायन नं जुया वनाच्वंगु दसुत नं आपालं दु। वास्तवय् देश व जनताया चकंगु भविष्यया लागिं जुयाच्वंपिं मनूत पलायत जुइमाःगु अवस्था मदु। मनूतय् जीवनय् भिंम्ह अभिभावक, भिंम्ह गुरु व भिंगु नेतृत्व गुम्हेसिनं चूलाकेफइ वयागु भाग्य हे चकनावनी। उकिं नं समाधानया मार्क्सवादी सिद्धान्त नालेगु इलय् व्यवहार विनाया सिद्धान्त कोरा भ्वं साबित जुइसा सिद्धान्त बिनाया व्यवहार नं मिखा कांम्ह द्वहं थें जुइ। हरेक वस्तु पुलां जुया वंलिसें उकी सिथिलता वइगु स्वाभाविक खः। मनूतय् जीवनय् नं निरन्तर छुं न्हूगु चीज सयेका च्वनेगु मयायेवं आलस्यता वइगु नं स्वाभाविक प्रकृया खः ।

धाइ लुँ व वहया मोहयात छक्वलं बजारय् पित बीबलय् वहया नक्कली सिक्कां लुँया सक्कली सिक्कायात हे विस्थापित यायेत स्वइ। अथेहे नक्कली व अपब्याख्या यानातःगु राजनीतिक सिद्धान्तं सक्कली सिद्धान्त कःघानाच्वंपिंत विस्थापित यायेत स्वइ। अथे जुयाः नं सिद्धान्तयात ब्यवहारया कसिइ चुलाः जक उकियात उचित वा अनुचित धाये फइ। कोरा सिद्धान्तयात जक ध्यानय् तयेबलय् छुं नं ज्या लगे मजुइफु। तर उकियात ब्यवहारय् हयेगु निंतिं गुकथं ज्या कायेगु धकाः स्वयेगु खःसा अवश्य न्हूगु बिचाः वयेफु। उकिं नं राजनीतिक पार्टीया नेतातय्सं चिचीधंगु ज्या धकाः बेवास्ता यायेगु उचित मजू। चिचीधंगु समस्यां हे जक तःधंगु समस्या वइगु जुयाः थःथःगु थासं थःगु योग्यता कथं ज्या याना वनेगु हे दक्कलय् बांलाःगु मार्क्सवाद व दक्कलय् बांलाःगु समाधानया उपाय नं जूवनेफु। कन्हय् तकं न्हूम्ह प्रधानमन्त्री ल्यये मफयाः अथें लानाच्वन धाःसा राजनीतिक सिद्धान्त हे फेल नःगु तायेकेगु मिले जूगु खँ मखु। अथे जुयाः नं सिद्धान्त व ब्यवहार नाप नापं वनेमाःगु खनेदु ।

More Stories Like this