छगू एमाले दुने ब्वलंगु निगू एमाले

नेकपा (एमाले)या न्वकु विद्या भण्डारीं आः नकतिनि पार्टीया हे छगू ज्याझ्वलय् न्ववासें एमाले धइगु वर्तमान इलय् पिनें स्वयेबलय् छगू हे पार्टी खःसां विचारया ल्याखं धाःसा निगू जुइधुंकल धकाः न्ववानादीगु धापुतिं आपालं कार्यकर्तायात चसक्क वन जुइमाः। वय्कलं धयादीगु खँ खाइसे ला च्वं, तर एमालेया यथार्थ धाःसा थ्वहे खः। थौंया मिखां एमाले छगू मखु स्पष्ट रुपं हे निगू जुइधुंकूगु दु। उकी मध्ये छगू 'एमाले'या नेतृत्व स्वय्म वय्कः विद्या भण्डारी व वय्कःया नेता केपी ओलीं यानाच्वंगु दु। ओली नेतृत्वया एमाले पूर्ण रुपं दक्षिणपन्थी भारतमुखी गुटय् डुबे जूवनेधुंकूगु दुसा झलनाथ नेतृत्वया एमाले अझ नं पार्टीया पुलांगु क्रान्तिकारी छबीयात ल्यंकेगु अन्तिम कसरत यानाच्वंगु दु। अथे हे जूगु कारणं छगू एमाले दक्षिणपन्थी कांग्रेसलिसे सतिउ वनाच्वंगु दुसा मेगु एमाले क्रान्तिकारी माओवादीलिसे सतिनाच्वंगु दु। विचार जक मखु, थ्व निगू एमालेया प्रवृत्ति, व्यवहार व शैली समेत वहे कथं विकसित जुजुं वनाच्वंगु आभास जुयाच्वंगु दु। तर मेगु यथार्थ थ्व नं खः कि एमाले दुने निगू एमाले ब्वलंगु मुलतः उकिया नेतातय् कारणं जक खः। एमालेया तःधंगु कार्यकर्ता पंक्ति अझ नं छगू एमाले व सशक्त एमालेया पक्षय् दनि। एमालेया नेतृत्व पंक्ति ति कार्यकर्ता पंक्ति पथभ्रष्ट मजूनि। बिचार निगू हे जूसां पार्टी छगू हे जुइमाः धइगु पक्षय् कार्यकर्ता दु। न्हापा जूगु पार्टी विभाजनया पीडा नेतातय्सं ल्वःमंकूसां कार्यकर्तां ल्वःमंकूगु मदुनि। एमालेयात नेतातय्सं कुचा यायेत स्वःसां कार्यकर्तां छधी याना तइगु विश्वास कायेफु गुगु न्हापांनिसें याना हे वयाच्वंगु नं खः ।

More Stories Like this