प्रेग्नेन्ट बाबा

नर्मदेश्वर प्रधान

याखँय्

प्रेग्नेन्ट बाबा। अर्थात् प्वाथय् दुम्ह बाबा। म्हिगः बहनी। भारतया टिभीइ गर्भधारण याःम्ह बाबा क्यनी। प्वाथय् न्याला दुम्ह मचा। बाबाया भुक्क च्वंगु प्वाः। ताताःहाकःगु दारि। गेरु वस्त्र। ल्याय्म्ह बैंस। थःगु प्वाथय् न्याला दुम्ह मचा दु। बाबां धाइ। दृश्य खनी। गय् खइ? न्ह्यसः दनी। गय् मखइ? मनय् प्रतिप्रश्न लुइ। मखुसा टिभीं छाय् क्यनी? बाबां प्वाः उलाः क्यनी। क्यामरां व हे प्वाथय् ताक याइ। न्याला दुम्ह मचा अन दु। उद्घोषकं लिसा लिसा कयाः हालाच्वनी ।

बाबा। मिजं । गर्भधारण गय् जुल जुइ? पत्याः याये फइ मखु। प्रकृतिं मचा दयेकेगु भार मिसातय्त बियातःगु दु। दायित्व कथंया शरीरया संरचना, गठन मिसातय् दइ। मचा दयेकेगु निश्चित प्रक्रिया दइ। प्रेग्नेन्ट बाबाया शरीर मिजंया। प्वाथय् गय् मचा लाइ? गय् थाइ? असम्भव ! असम्भव धयां छु याये? टिभीं क्यनी। प्रेग्नेन्ट बाबा। बकाइदा प्वाः उलाच्वनी। क्यनी। दुने मचा न्याला दयेधुंकल। टिभीं बिना हिचकिचाहट घोषणा याइ ।

अझअजूचायापुगु खँ। प्रेग्नेन्ट बाबाया गर्भधारण गुगुं सहवासया लिच्वः मखया बी। कारण झं गजबगु जुइ। प्रेग्नेन्ट बाबाया प्वाथय् दुगु फल नयाः खनी। प्रेग्नेन्ट बाबाया प्वाथय् मचा बीजारोपणया हेतु फल जुइ। न्याला न्ह्यः नःगु फलया लिच्वः, बाबाया प्वाथय् दइ। बाखनय्, पुराणय् जक थुज्वःगु खँ वः। तर यथार्थ थथे जूगु न्यने मदु। प्रेग्नेन्ट बाबाया खँ न्यने। पुराण। मिथक न्यनाच्वनागु अनुभव जुइ। च्वय् च्वय् ब्वइ। बाबा, ऋषिमुनि। थुपिं वास्तवय् वैराग्यं थिउपिं जुइ। थुपिं धन, सम्पत्ति, भौतिक तृष्णा, आकर्षणं विमुख जुइमाःपिं जुइ। इमि ध्यान, समाधीइ हे व्यस्त जुइ। बाबा, ऋषिमुनिपिनि आदर्श थथे जुइमाः। धाइ। सामान्य मान्यता जुइ। तर व्यवहारय् बाबा, ऋषिमुनितसें थःगु आदर्शयात हाचांगाःगु दसुत पुराण बाखनय् नं दु। अप्सरातलिसे लसपस याःगु बाखंत न्यनेदइ ।

पशुपतिइ छम्ह बाबा दु। जितः लुमं। वयात खडेबाबा धाइ। कारण, व सदां दनाच्वनी। गबलें मेगु मुद्राय् च्वनी मखु। सदां दनाच्वनीम्ह बाबा। उकिं वयात खडेबाबा धाइ। यक्व न्ह्यःया खँ खः। जिं न्यना, खडेबाबां दँदं हे मचा दयेकल हं ! बाबातय् चर्चा वइबलय् खडेबाबाया चमत्कारया नं चर्चा जू। मचा दयेकीपिं बाबातय् बयान न्यने नं। तर थम्हं हे गर्भधारण याःम्ह बाबाया खँ धाःसा तसकं न्हूगु जुइ ।

पत्याः याये हे थाकुगु। प्रेग्नेन्ट बाबां मेथाय् कयेकूगु वाण लिखतं वयाः थःगु गर्भाशयय् लात ला? उकिं प्वाथय् दुगु खः ला? अनुमान याये माला बी। टिभी स्वये। द्यने। द्यनेत छ्यं फुंगाय् दिके। प्रेग्नेन्ट बाबा मिखाया न्ह्यःने दं वइ। फल नयाः प्वाथय् दुगु खँ। लुमना वइ। ग्यासें वइ। फल ला नया। थम्हं नं। आमाःसि, स्याउ। मखु थें जुइगु खः ला? प्वाक्क छुं जूसा। फल नये नं ग्यानापुल। त्रास, भय लुइ। मखु। छु छु जक जुयावःगु? कलियुग धाःगु थ्व हे खः ला? कन्हय् जाकि नयाः नं प्वाथय् दया बीगु खः ला? छु याये? लः त्वन कि हे गर्भधारण जुयाबीगु खः ला? छु याये? छु नयाः, छु त्वनाः च्वनेगु अले? थौं फलया खँ वल। कन्हय् फय्या खँ वयेफु। फय् घुतुकाः हे प्वाथय् दइगु सम्भावना दया बिल कि छु याये? न्ह्यः वइमखु। मतिइ अने अने खँ लुयावइ ।

मतिइ लुइ। मचा दयेकेत अझ ब्याहाबिया छ्वये माली मखुत। मचा दयेके यःम्हं फल नःसा गाइ। प्रेग्नेन्ट बाबाया उदाहरणं थ्व खँ प्रमाणित याइ। तर प्रेग्नेन्ट बाबां नःगु फल छु खः? स्पष्ट मजूनि। फल छु? सीकेत जिज्ञासा लुइ। सीके फुसा झी ६०१ सभासद बाबापिंत नं नकाः टिभीइ थने हे दइ। उपिं ज्या मदयेकाः च्वनेमाली मखु। इमि ज्या दइ। इपिं उपब्धिपूर्ण जुइ। इपिं प्रचारय् वइ। सकस्यां म्हसी। विश्वप्रसिद्ध जुइ ।

प्रेग्नेन्ट बाबाया प्वाःया मचा। सदां न्याला जुयाच्वनी मखु। वृद्धि जुइ। प्वाथय् दयेधुंकूम्ह मचा। सुना वनी मखु। लां गात कि ला पिहां वयेत स्वइ। प्वाथय् दुगु खँ स्वयां अझ जिज्ञासाया खँ ला थुथाय् जुइ। प्रेग्नेन्ट बाबाया मचा गय् बुइ? निकासया प्रश्न जुइ। प्रेग्नेन्ट बाबां मचा दुगु खँ ला प्रसारय् हइ। तर दुम्ह मचा गय् बुइकेगु? उपाय वं छु सोचे यानाच्वन? वं डाक्टरलिसे सल्लाह यात ला मयाः। प्रेग्नेन्ट बाबाया प्वाथय् सोनोग्राम याये धुंकल। रिपोर्टय् मचा दुगु निश्चय जुइ। तर धाइ, प्रेग्नेन्ट बाबां रिपोर्ट सार्वजनिक यायेत तयार मजू। टिभीं खबरय् धयाच्वनी। थ्व खँ न्यने। प्रेग्नेन्ट बाबां मनूतय्त झंगः लानाच्वंगु ला मखुला? आशंका लुइ। तर टिभीइ प्रेग्नेन्ट बाबा घरिघरि क्यनी। मचा सनाच्वंगु खँ ल्हानाच्वनी। टिभीं हे क्यनाच्वंगु। पत्याः याये माला बी। थौंकन्हय् छु खः? छु मखु? निर्धारण टिभीं हे याइ। भर टिभी हे जुइ। गय् पत्याः मजुइ?

मचाबलय् मां, अजिपिंसं धाइगु खँ लुमनी। मचातसें मां, अजिपिंके मचा गय् बुइ? न्यनी। अबोध प्रश्न। न्हाय्पनं बुइ का। सीकी मचा। मां�अजिपिनि लिसः जुइ। जिं नं थ्व खँ मचाबलय् न्यने नं। पत्याः याये नं। प्रेग्नेन्ट बाबा लुमनी। वया प्वाथय् च्वंम्ह मचा झिला दइ। 'अँय्या' हालाः पिहां वइ। तर गनं? पिहां वइगु राजमार्ग गुगु जुइ?
मचाबलय्या खँ लुमनी। 'न्हाय्पनं का' सीकी मचात ! मां बज्येपिनि खँलिथ्वइ। प्रेग्नेन्ट बाबाया मचा ख्येँ तज्यानाः खाया मचा पिहां वइ थें प्वां ध्वाङ्ग तज्यानाः वइगु खः ला? वा न्हाय्पनं पिहां वइ। टिभीं छकः क्यंसां जिउ ।

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
नेवाःतय्त जागृत याइगु 'नेपाःमिया नुगः सः'
खँ स्वनिगःया