डा. केशवमानया छु पहः ?

सम्पादकजु,

नेपालय् शाहवंशया शासन अन्त जुल । तर शाहवंशया दुगःक्वँय् शाही सेना धाःसा गथे खः अथे हे तिनि । आंग्सां निसें पालीतःले तक वहे मनू वहे बिचाः तिनि । नापं थुपिं नेवाः विरोधी नेवाः स्वशासन विरोधी नं खः । नेवाःतय्त ज्यापु धकाः हेला व यातना बीपिं थुपिं हे मखुला ? थुमित नागरिक सरकारया मातहतय् हये मफुत धाःसा नेपाःया गणतन्त्र लोकतन्त्र दक्व खतराय् लाइगु अवश्यंभावी । डा. केशवमानया शाही सेना भक्ति छाय् ?

शाही सेनाया लिधंसा धइगु भारत व अमेरिका हे मखुला ? शाही सेना व जनसेना ल्वाकेगु अशान्ति ब्वलंकेगु देय्यात कमजोर व असफल यायेगु अले थःगु नियन्त्रण क्वातुका तयेगु भारत व अमेरिकाया योजनायात ल्वःमंके जीला ? देय्यात थ्व नरक गालय् मलाकेगु खःसा शाही सेनाया लोकतान्त्रीकरण मयासे मजिउ । लोकतान्त्रीकरणया पलाःयात शाही सेनाया अपमान खनीगु डा. केशवमानया छु पहः थ्व ?

अन्तरिम संविधानं अलंकारिक दयेकातःम्ह राष्ट्रपतिया सक्रिय रेर्प्री जुइत बिन्तिपत्र तयादिल । उबलय्या प्रम गिरिजाया आदेश पालना मयाइम्ह कटवालयात बचे यायेत संविधान विरोधी पलाः ल्ह्वने माल धकाः राष्ट्रपतियात ग्वाकेगु डा. केशवमानया छु पहः थ्व ?

- डा. महेशमान नेवाः ।

More Stories Like this