चःबि मदयाः पर्यटकतय्त सास्ति
ख्वप (झीगु स्वनिगः)
नगर दुहाँवनीपिं पर्यटकपाखें न्हिं लाखौं तका म्हयाः वयाच्वंगु ख्वप नगरपालिकां पर्यटकपिनिगु नितिं मदयेकं मगाःगु चःबिया पर्याप्त व्यवस्था मयानाः पर्यटकतय्सं दुःख फयेत बाध्य जुयाच्वंगु दु ।
नगरपालिकां नगर दुहाँ वनीगु १६ गू नाकाय् काउन्टर पलिस्था यानाः पर्यटकलिसे धेबा म्हयाः वयाच्वंसां नं माःकथंया चःबि मेमेगु पूर्वाधारया नापं अभाव दुगु च्यूताः पर्यटक लिसे गाइडतय्सं प्वंकाच्वंगु दु ।
नगरदुने गुलिखय् थासय् चःबि मालाः जुइमाःगु चःबिया हे नितिं होटल दुहाँवनेगु दुगु चपि नं लः मदइगु फोहोर नवइगु साबुं लिसे ट्वाइलेट पेपर मदइगु जूगुलिं पर्यटकतय्सं सास्ति फयेमालाच्वंगु अस्ट्रेलियन नागरिक मार्क ब्रोजीं च्यूताः प्वंकादिल ।
अथेहे नगरदुने पर्यटकीय थाय्बारे जानकारी बिइगु निकायया अभाव व सामान मीपीं हक्करं जबरजस्ती सामान न्यायेत दबाब बियाः पर्यटकतय्सं हैरानी फयेमाःगु पथप्रदर्शक प्रकाश जोशीं धयादिल । नगरपालिकां सार्क राष्ट्र लिसे चीनया नागरिकलिसे प्रतिव्यक्ति ५० तका व गैरसार्क राष्ट्रया नागरिकलिसे प्रतिव्यक्ति ७५० तका अर्थात् १० अमेरिकी डलर प्रवेश शुल्क कायेगु यानाच्वंगु दु ।
नगरपालिकाया पर्यटक काउन्टरया प्रमुख गौतम लासिवां चःबिया अभाव मदुगु दाबी यानादिसें छुं चःबित अपुग जूगु व दुगु चःबि नं मर्मत सुधार यायेगु ज्या न्ह्यःने न्ह्याकूगु जानकारी बियादिल ।
