बजेटया ई क्वःछिइत इनाप
येँ (झीगु स्वनिगः)
सरकारं व्यवस्थापिका संसदय् बजेट पेश यायेगु न्हि क्वःछिइत सभामुख सुवासचन्द्र नेम्वाङयात इनाप याःगु दु ।
अर्थमन्त्री सुरेन्द्र पाण्डें म्हिगः सभामुख नेम्वाङयात नापलानाः बजेट पेश यायेगु न्हि क्वछिइत अनौपचारिक इनाप याःगु खः ।
स्वन्ति न्ह्यः सदनय् बजेट पेश यायेगु व कात्तिक मसान्तदुने हे माःगु सहलह यानाः पास यायेगु सरकारया तयारीबारे अर्थमन्त्री पाण्डें सभामुखयात जानकारी नं ब्यूगु खः ।
सिंहदरबारय् च्वंगु सभामुखया कार्यकक्षय् नापलानाः नेम्वाङं दलतलिसे सहलह यानाः बजेट पेश यायेगु न्हि क्वःछिइगु लिसः ब्यूगु अर्थमन्त्री पाण्डें साचारकर्मीपिंत जानकारी बियादिल । राजनीतिक सहमति जुइमफया आर्थिक दँ २०६७/६८ या पूर्ण बजेट सदनय् पेश यायेमफयेवं आर्थिक संकट वइगु खतरा अप्वःगु दु ।
