पोखराया न्यायाधीश सुवेदी निलम्बित
पोखरा (झीगु स्वनिगः)
पुनरावेदन अदालत पोखराया न्यायाधीश ओमप्रकाश सुवेदी निलम्बनय् लाःगु दु ।
कार्यक्षमताया अभाव पदीय मर्यादा इमान्दारीपूर्वक निर्बाह मयाःगु व खराब आचरण जूगुलिं सुवेदीयात निलम्बन याःगु कानूनमन्त्री प्रेमबहादुर सिंहं जानकारी बियादिल । सुवेदीया पदीय मर्यादाबारे छानबिन यायेत न्यायाधीश तपबहादुर मगरया संयोजकत्वय् छानबिन समिति नापं नीस्वंगु दु ।
सर्बोच्च अदालतया न्यायाधीश बलराम केसीया अध्ययन प्रतिवेदनया आधारय् परिषदया म्हिगः च्वंगु बैठकं न्यायाधीश सुवेदीयात निलम्बन यायेगु निर्णय याःगु खः । छुं दिं न्ह्यः पोखराय् याःगु छगू ज्याझ्वलय् फुक्कं सभासदया माननीय पद लाकाः कायेमाःगु अभिव्यक्ति बिइवं सुवेदी विवादय् लाःगु खः ।
