चीन भ्रमण नितान्त व्यक्तिगत - अनन्त
येँ (झीगु स्वनिगः)
एकीकृत नेकपा माओवादीया स्थायी समिति दुजः व सैन्य विभाग इन्चार्ज बर्षमान पुन 'अनन्तं' जनमुक्ति सेनाया ब्यक्तिगत चीन भ्रमणयात कयाः प्रधानमन्त्रीं ब्यूगु अभिब्यक्तिप्रति स्पष्टिकरण बिइमाःगु धयादिल ।
येँय् याःगु छगू ज्याभुवलय् अनन्तं जनसेनाया कमाण्डरयात कार्वाही याये धइगु प्रधानमन्त्री माधबकुमार नेपालया अभिव्यक्ति मर्यादा अःखः जूगु धयादिल । प्रधानमन्त्री व छुं नेतातय्सं थःगु हैसियत ल्वःमंकाः ब्यक्तिगत भ्रमणयात राजनीतिक रङ ब्यूसें धम्कि व स्पष्टिकरणया बिषय दयेकूगु धासें वय्कलं असन्तुष्टि प्वंकादिल । सेना समायोजन विषेश समितिया दुजः नापं जुयाच्वंम्ह अनन्तं जनसेनाया कमाण्डरं पार्टी नायः प्रचण्ड मू छ्यााजे जनसेनाया चेन अफ कमाण्ड व अनमिन फुक्कसित जानकारी बियाः कानूनी प्रकि्रया पूवंका चीन भ्रमणय् वंगु स्पष्ट यानादिल ।
जनसेनाया कूलसंख्या मध्ये झिंनिगू प्रतिशतं थःमकासे छुट्टीइ च्वनेदइगु नियमकथं बियाः च्वंगु इलय् भ्रमणय् वंगु वय्कःया धापू दु ।
अथेहे जनमुक्ति सेनाया प्रबक्ता व डेपुटी कमाण्डर चन्द्रप्रकाश खनाल 'बलदेवं' चीन वंपिं जनसेनायात कारवाही यायेगु धइगु प्रधानमन्त्री माधवकुमार नेपालया धापू न्हिलासुं जाःगु धयादिल ।
रुपन्देहीया बुटवलय् म्हिगः साचारकर्मीलिसे खँल्हासें वय्कलं जनसेना विदेश भ्रमणय् वनेमदइगु गनं च्वयामतःगुलिं यदि कारवाही याःसा उकिया उचित लिस बिइगु ख्याच्वः नापं बियादिल ।
