स्वंगू देय् स्वाइगु राजमार्ग छगू लेनया

नुवाकोट झीगु स्वनिगः

गल्छी - त्रिशूली - स्याप्रु - रसुवागढी मार्ग निर्माण क्वचायेधुंकाः भारत नेपाःया लँपु जुयाः चीन स्वाइगु दकले चिहाकःगु लँपु जुइ थ्व । तर स्वंगू देय् स्वाइगु मार्ग छगू लेनया निर्माण जुयाच्वबलय् स्थानीयवासीं निगू लेनया दयेकेमाःगु माग याःगु दु ।

वीरगाजनिसें रसुवागढी स्वाइगु थ्व लँपु साचालनय् वयेधुंकाः थन सवारीसाधनया चाप अप्वइगु गल्छी त्रिशूली स्याप्रुबेसी सतक स्थानीय सरोकार समितिया नायः इन्द्रबहादुर पण्डितं धयादिल ।

तर गल्छीपाखें रसुवागडीतक्कया मार्ग छगू लेनया निर्माणं थ्व मार्ग छुं दँय् हे चिब्याः जुइगु पण्डितया धापू दु । आः दयेकाः च्वंगु निर्माणाधीन गल्छी रसुवागढी मार्ग राजमार्ग मजुसे सहायक मार्ग जूगुलिं छगू लेनया निर्माण याःगु गल्छी त्रिशूली स्याप्रु सतक योजनाया प्रमुख अयोध्याप्रसाद श्रेष्ठं धयादिल ।

'राजमार्ग मखु सहायक मार्ग खः उकिं निगू लेनया दयेकीमखु ।' योजना प्रमुख श्रेष्ठं न्ह्यथनादिल - छगू लेनया इस्टमेट जूकथं निर्माण यानाच्वंगु खः । लिपा मालधाःसा सरकारं सतक हाकनं विस्तार याइला तर निकट भविष्यय् हे सवारीया चाप अप्वइगु क्षेत्रय् छगू लेनया मार्ग निर्माण जुइगु अदूरदर्शीपना जूगु बट्टारया उद्यमी धननारायण चित्रकारं जानकारी बियादीगु दु ।
न्हापा सुनां नं च्यूताः मब्यूगुलिं आपालं लगानी जूगु सतक नं चिब्या जूगु सरोकारवालापिनिगु धापू दु । एशियाली विकास बैंकया अनुदान ग्वाहालिइ नेपालं निर्माण यानाच्वंगु सतक छगू अर्ब झिंखुगू करोड लगानी जुयाच्वंगु दु । थ्व धेबा गल्छीनिसें स्याप्रुबेसीतक्क गुइगू किलोमिटर सतक निर्माणया नितिं खः ।

रसुवाया न्हापांगु तसकं प्रभावित स्वंगू किलोमिटर क्षेत्रय् धाःसा अलकत्ता लाइमखु । आःतक्क न्ययेगू प्रतिशत ज्या क्वचायेधुंकूगु जानकारी ब्यूगु दु ।

प्यंगू न्यागू मिटर ब्याया थ्व सतक प्यंगू प्याकेजय् निर्माण जुयाच्वंगु दु । स्याप्रु - रसुवागढी झिंन्हय्गू किलोमिटर मार्ग धाःसा चीनं निर्माण यानाच्वंगु दु ।

फेबु्रवरी २००९ पाखें निर्माण न्ह्याःगु मार्ग सन् २०११ फेबु्रवरीइ निर्माण क्वचायेके माः । वीरगाज पथलैया गल्छी त्रिशूली धुाचे - स्याप्रुबेसी रसुवागढी मार्ग निसः व खुइन्यागू किलोमिटर जक खः । थ्व मार्ग थौंकन्हय् साचालनय् दुगु वीरगाज - मितेरी साँघु कोदारी राजमार्ग स्वयाः स्वीगू किलोमिटरं चिहाकः जू ।

More Stories Like this