देवस्थल - सुवर्णपुर अर्थात् लुँभु देश

पं. नन्दप्रसाद गौतम

परापूर्वकालय् फुलचोकी देवीया कोय् गुफाय् कामधेनु सा च्वनाच्वनीगु जुयाच्वन । लः त्वनेत व कामधेनु सां न्हिंन्हिं व पर्वतय् थःगु न्येकुतिं चा चिइकेगु यात । अनं लः पिहांवयाः खुसि न्ह्यात । वया नां सिंगमति जुल । थ्व कामधेनु सां थःगु तुति खुरं खुर यानाः म्हूगु गालं लः पिहांवयाः खुसि न्ह्यात । थ्वया नां खुरमति जुल । थ्व निगुलिं खुसि ल्वाकःज्याःगु थासय् दोभानय् तीलधारा बगय् जुल । थ्वयात तीलगंगा धाल । थ्व थासय् भाद्र शुक्ल चौथी कुन्हु मोल्हुयेगु मेला दयेकल । थ्व थासय् मोल्हुयाः त्रिपुण्डेश्वर महादेव पूजायाइगु शिवलिङ्ग आःतकं द हे दिन । अन सत्संग न्ह्यानाच्वंगु हे दु ।

थ्व कामधेनु सां न्हिथं श्रङ्गिऋषियात परिक्रमा यानाः पशुपति महादेवयात दुरु छानाः पुजा शुभारम्भ याइगु खँ हिमवत्खण्डय् वर्णन दु । छन्हु कामधेनु साया तांन्वयाः पलख आराम यायेमनं थौंकन्हय् लुभु देशय्च्वंगु तःमागु वंगलसिमाय् लिधनाः च्वंबलय् न्ह्यः वल खनी । न्ह्यलं चाःबलय् ई वनेधुंकूगु जुयाच्वन । सा ग्यानाः खि म्हूबलय् व गोबरं जीव प्रकट जुयाः आज्ञा दत- जि छंगु गोबरय् नं दु । आः छ न्हिथं गोलय् थ्यंक वयेम्वाल । फुलचोकीया कोय् यल इलाकाया फुक्कं भागय् सिंचाई यानाः अत्र सयेकाः फुक्कंसितं लःहियेगु ज्या या । छंगु हे गोबरया नामं गोदावरी खुसि न्ह्याइ ।

थुलि धयाः जीव अन्तरध्यान जुल । अन ऋङ्गिऋिषं साधना यात । शिवलिङ्ग प्रकट जुल । श्रङ्गिऋिषं गोबर। प्रकट जूम्ह शिवलिङ्ग जुयाः थ्वया नां गोभ्राटेश्वर महादेव नामाकरण याःगु जुल ।

थ्व हे शिवजीयात आराधना यानाः वैश्य दम्पितं महादेवयात लुँया कुसा छायेगु नापं ब्रम्हुतय्त नीछपी २१ रोपनी बुं दान याःगु जुल । थ्व जग्गा तिल्पुखुसिंनिसें पूर्व दक्षिणया गुठी जग्गा खः । धान्यपूर्णे अर्थात् योमरीपुन्ही व अक्षय तृतीया कुन्हु जप यानाः न धकाः पुजावारीयात धयातःगु दु धाइ ।

पशुपति क्षेत्र गोल देशय् थें लुँ देशय् नं १४ म्ह दुवालं पालंपाः महालक्ष्मीद्योयागु जात्रा यायेगु गुठी चलय याना वयाच्वंगु दु । थ्व देगलय् ६४ लिङ्गया जमानायाम्ह गणेश सरस्वती नं दु । थ्व प्रथा ६०० दँ न्ह्योयागु खः । न्हापा महालक्ष्मीया पीठ देवीस्थान घना जंगलय् लाः । लिपा गंगा महारानीया राज्यकालय् लुँया भु बंधकी बह्र तयाः जग्गा न्यानाः थौंकन्ह्य यागु बस्ती दयकाः देःगः दयेकाःतःगु खँ राजगुठी दर्ता दु ।

न्हापा द्यत मनूया रुपय् थासं थासय् चाःहिलीगु जुयाच्वन । अथे हे लुँभु देशया भैरद्यनं बुंगमतीं वःम्ह जुयाच्वन ।