बजेट मखु सरकार दयेकि

इलय् बजेट पिहां मवइगु स्थितिं सरकारय् च्वनाच्वंपिं मनूत व दलत लः मदुगु थलय् न्या फाताफाता पुलेथें - पुलाच्वंगु दु । न्ह्यानाच्वंगु प्यलाया बजेटं मेगु महिना अर्थात मंसिर महिना धानय् मजुइगु स्पष्ट दु । बजेट हयेगु नितिं माधव नेपालया कामचलाउ सरकार हत्थाय् चायाच्वंगु जक मखु सरकार न्ह्याकेत हे तःधंगु पंग वइगु ख्यावलं त्रस्त दु ।

तर एकीकृत नेकपा माओवादीं कामचलाउ सरकारं बजेट हयेमफैगु व न्हूगु सरकार दयेकाः जक बजेट हयेमाःगु खँय् बहः बियावयाच्वंगु दु ।

थुकि छु खँ स्पष्ट जुयाच्वंगु दु धाःसा वर्तमान कामचलाउ सरकारं फुसा व्यवस्थापिका संसदं बहुमत वा सहमितं बजेट हयेगु मफुसा अध्यादेशपाखें जूसां बजेट हयेत कामचलाउ सरकारं तयारी यानाच्वंगु दु । वइगु १५ गते अर्थात स्वन्ति न्ह्यःहे बजेट पेश यायेत सनाच्वंगु खः । थुकिया नितिं अर्थविद्तय्गु छगू पुचलं अर्थमन्त्रीयात ग्वाहालि यानाच्वंगु सीदु ।

बजेट हयेत पालिंनिसें बल पिकयाच्वंगु कामचलाउ सरकारया कुतः नाजायज खः । प्रधानमन्त्री माधवकुमार नेपालं राजीनामा बीधुंकाः सरकारयात बजेट हयेगु नैतिक अधिकार दइमखु । सरकार विहीन अवस्थाय् सरकारया ज्या धयागु मेगु न्हूम्ह प्रधानमन्त्री ल्ययाः न्हूगु सरकार गठन यानाः जक बजेट हयेगु ज्या जुइमाःगु खः । तर कामचलाउ सरकारं थुखेपाखे भ्याःहे ध्यान मबिसे अधिकारविहीन व हैसियत मदुगु सरकारं हे बजेट हयेगु धकाः गुगु खँ प्रचारय् हयाच्वन - थ्व लोकतान्त्रिक सामान्य मूल्य व मान्यताया पाय्छि अःखः व स्पष्ट ज्या खः ।
सरकारयात सामान्यरुपं खर्च यायेत हे धेबाया अभाव जूगु हे धयागु खःसा कामचलाउ सरकारं दकले न्हापां न्हू दिल्लीइ विन्ति पौ तयाः ख्वयाः हालाः न्हूम्ह प्रधानमन्त्री ल्ययेगु पाखे पलाः छीमाः ।

न्हूम्ह प्रधानमन्त्री ल्ययाः सरकार गठन याकेमबीगु अले कामचलाउ सरकारयात हे यथावत तयाः बजेट हयेत जक सनेगु धयागु ख्वबिलु खँ खः । ख्वयाः राजनीति यायेगु कायरता खः । थुज्वःगु कायरताया प्रदर्शन यायेगु नेपाःमि जनताया नितिं सह्य खँ जुइमखु ।

गनतक्क सहमति यानाः बजेट हयेगु धयागु खँ दु - थ्व खँय् सम्भावना मदुगु हे थ्यंक धाःसा मखु ।

संविधानसभाय् दकले तःधंगु दल जनादेशप्राप्त माओवादी नाप सहलह ब्याकेफु । तर कामचलाउ सरकार थुखेपाखे मवंसे एकशुरं व्यवस्थापिका संसदय् बहुमतं पारित यायेगु याकेगु गुगु दुस्साहसया प्रदर्शन यानाच्वन उिकं मात्रै विश्वया न्ह्यःने न्हीकेगु ज्या बाहेक मेगु छुं जुइख्वाः मवः ।

लोकतान्त्रिक मूल्य व मान्यताया अःखः ज्या यानाः कामचलाउ सरकारं बजेट ला हयेफै तर थुकिं दीर्घकालिन रुपं नेपाःया शासन सत्ताय् मखुगु व मज्यूगु नजिरं थाय् काइगु खँय् शंका मदु । उिकं यायेमाःगु ला न्हूम्ह प्रधानमन्त्री हयेत पंगः जुयावनाच्वंम्ह कांग्रेसी संसदीय दलया नेता व प्रमया छम्ह जक उम्मेदवार जुयाच्वंम्ह रामचन्द्र पौडेलयात चीकाः सहमतिया आधारय् न्ह्यःने वनाः - दकले न्हापां न्हूगु सरकार दयेकेमाः । अले जक स्वतः पिहांवइगु बजेटया खँ ल्हायेगु नैतिकरुपं सही जुइ ।

More Stories Like this