स्वन्ति नखःया खँय् नेवाःतय्गु डेलिगेशन
येँ (झीगु स्वनिगः)
स्वन्ति नखः व नेपाल संवतयात कयाः म्हिगः सोमवाः येँया नेपालभाषा मंकाः खलः न्हूदँ समारोह समिति ११३१ पाखें प्रधानमन्त्रीयाथाय् डेलिगेशन वंगु दुसा आः याकनं हे नेवाःतय्गु राष्ट्रिय संगठन नेवाः देय् दबूपाखें समन्वय यानाः थीथी नेवाःतय्गु खलः पुचःतय्गु मंकाः कथं प्रतिनिधित्व याकाः डेलिगेशन वनीगु जूगु दु ।
म्हिगः न्हूदँ समारोह समितिपाखें प्रधानमन्त्रीयात नेपाल संवत्या न्हूदँया नामं हे म्हपुजाखुन्हु विदा बिइमाःगु अले किजापुजा खुन्हु नं विदा बिइमाःगु माग याःगु खः । उगु मागयात कयाः प्रधानमन्त्रीं उकिया नितिं संस्कृति मन्त्रालययात निर्देशन बिइ धकाः बचं बियादीगु खः । अथे हे न्हूदँ खुन्हु बसन्तपुरय् जुइगु समारोहलय् वयेगु बचं नं बियादीगु खः । थ्वहे झ्वलय् नेवाः देय् दबूपाखें कार्तिक २० गते शनिवाः लक्ष्मीपुजा २१ गते आइतवाः खुन्हु न्हूदँ व म्हपुजा नापं २२ गते सोमवाः खुन्हु किजापुजा हनेत नेवाःतय्त इनापयासें व हे कथं नखः हनेगु लकस ब्वलंकेत नापं माःगु कथं विदाया ब्यवस्था यायेत सरकारयात सचेत नं याःगु दु ।
