साइनबोर्डय् नेपाल लिपि छ्यकेत नेवाः मोर्चां दवाव अभियान न्ह्याकीगु
येँ (झीगु स्वनिगः)
एकीकृत नेकपा माओवादी या जातीय मोर्चा नेवाः राष्ट्रिय मुक्ति मोर्चा नेपाःपाखें थुगुसी न्हूदँ नेपाल संवत् ११३१ हनेगु झ्वलय् स्वनिगलय् थीथी पसः नापं व्यापारिक प्रयोग व मेमेपिन्सं तयातःगु साइबोर्ड व होरिङबोर्डय् नेपाल लिपि प्रयोग याकेगु नितिं दबाबमुलक आभियान न्ह्याकीगु जूगु दु ।
नेवाः स्वायत्त राज्य संविधानय् सुनिश्चित याकेगु नितिं छगू कथं दबाब बिइगु नापं स्वनिगलय् नेवाः राज्यया महसूस याकेगु नितिं अथे साइनवोर्ड व होरिङबोर्डय् नेवाः लिपि प्रयोगया नितिं दबाव मुलक ज्याझ्वः यायेगु धकाः मोर्चाया वंगु शनिवाः च्वंगु मुँज्यां खँ क्वःछ्यूगु खः ।
अथे हे उगु मुँज्यां न्हूदँया हे झ्वलय् थीथी थासं येँय् वइगु रुटय् चलेजुयाच्वंगु वसया रुट प्लेटय् 'काठमाण्डौं'या थासय् नेवाः राज्य धकाः च्वकेगु अभियान नं न्ह्याकेगु खँ क्वःछ्यूगु दु । न्हूगु संविधान व न्हूगु संघीय नेपाःया नितिं न्हूदँया भिंतुना धैगु मू नारा थ्वयेकाः थुगुसी नेवाः मोर्चां थाय् थासय् थीथी कथंया ज्याझ्वः नं याइगु जूगु दु ।
मोर्चाया केन्द्रपाखें वइगु २३ गते न्हूदँया लसताय् भिंतुना कालबिल नापं तुच्चा ज्याझ्वः याइगु जूगु दु । अथे हे मोर्चाया हे नेवाः ल्याय्म्ह पुचःपाखें वइगु २० गते येँया बसन्तपुरं मोटरसाइक र्-याली पिकाइगु जूगु दु । उगु हे कथं क्यालेण्डर पिकायेगु त्वाः त्वाल गां गामय् नापं वडा वडाय् तकं मोर्चापाखें स्थानीय स्तरया भिंतुना कालबिल नापं चियापान ज्याझ्वः नापं मेमेगु ज्याझ्वः नं याइगु जूगु दु ।
