एमाले बैचारिक रुपं विभाजित
येँ (झीगु स्वनिगः)
नेकपा एमले सांगठनिक रुपं छगू जूसां पार्टीया नायः झलनाथ खनाल व वरिष्ठ नेता केपी शर्मा ओलीया दथुइ बिभाजित जूगुलिं बैचारिक रुपं निगू जुयाच्वन धकाः थीथी मनूतय्सं धयाच्वंगु खँयात पुष्टी यायेगु ज्या स्वयं एमालेया हे न्वकु विद्यादेवी भण्डारीं यानादीगु दु ।
एमालेया येँ जिल्ला समितिया ग्वसालय् म्हिगः सोमवाः पार्टीया केन्द्रीय ज्याकू बल्खुइ जूगु भेलाय् मूपाहांया थासं न्वंवासें वय्कलं एमाले दुने वैचारिक रुपं निगू खेमा दु धकाः न्वंवानादीगु खः ।
वर्तमान कामचलाउ सरकारया रक्षा मन्त्री तकं जुयाच्वंम्ह वय्कलं धयादिल सांगठनिक रुपं छगू हे जूसां एमाले वैचारिक रुपं निगू खेमा दु वामपन्थि आन्दोलन व एकीकृति माओवादीयात स्वयेगु दृष्टीकोणय् चरम विवाद दु ।
लिपांगु इलय् वयाः एमालेया न्वकु विद्यादेवी भण्डारी ओली पक्षधरयाम्ह खःसा विषेशयाना माओवादीप्रति ओली गुगु कथं आक्रमक रुपं प्रस्तुत जुयाच्वंगु दु उगु हे कथं भण्डारी नं न्ह्याः वयाच्वंगु दु ।
म्हिगःया उगु भेलां नेपाल संवत ११३१ न्हूदँ तःजिक हनेगु नितिं धकाः एमालेया जिल्ला कमिटीया कजि निर्मल कुइकेलया संयोजकत्वय् न्हूदँ समारोह समिति नीस्वंगु खः । उगु समितिया सह संयोजकय् लालबहादुर तामाङ च्वनादीगु दुसा छ्याजेय् विद्या सुन्दर शाक्य च्वनादीगु दु ।
एमालेया येँ जिल्लाया फुक्क हे दुजःत दुथ्याका द्वःछिम्हं मल्याक दुजःत तयाः दयेकूगु उगु न्हूदँ समारोह समितिपाखें आवंलि येँया बसन्तपुरय् जुइगु ज्याझ्वलय् केन्द्रीकृत कथं मवःसे थःथःगु लागाय् जुइगु न्हूदँ समारोहलय् ब्वति कायेत येँ जिल्लाया स्थानीय कमिटीतय्त निर्देशन बीगु धकाः नं खँ क्वःछ्यूगु दु ।
ज्याझ्वलय् एमालेया केन्द्रीय नेता राजेन्द्र श्रेष्ठ नापं मेमेपिं नेतातय्सं नेपाःया राष्ट्रिय संवत नेपाल संवतया महत्वयात कयाः न्वंवायेगु नापं नेपाल संवतयात ब्यवाहारिक रुपं प्रयोग यानाः यंकेगु नितिं थःपिनिगु हे दलया नेता माधवकुमार नेपाल प्रधानमन्त्री जुयाच्वंगु इलय् ज्या यायेमाःगु खँय् बहः बियादीगु खः ।
