संविधानसभाया अवमूल्यन
परम्परागत संसदीय व्यवस्थाप्रति माओवादीया असहमित
येँ (झीगु स्वनिगः)
एकीकृत नेकपा माओवादीया न्वकु नारायणकाजी श्रेष्ठ प्रकाशं आःया अवस्थाय् कांग्रेसं प्याकेजया सहमतिया नामय् संविधानसभाया अवमूल्यन यायेगु कुतः यानाच्वंगु दु धकाः धयादीगु दु ।
वय्कलं संविधानया अन्तरवस्तु शान्ति प्रकि्रया व सरकार निर्माणया खँ छथासं लाकाः छक्वलं पिने सहमति यायेमाः धकाः गुगु कथं कांग्रेसं प्याकेजु सहमति धयाच्वन व प्रति एकीकृत माओवादी सहमत मदु धयादिसें व प्रस्ताव हे संविधानसभाया अवमूल्यन यायेगु प्रस्ताव खः धकाः तकं धयादिल ।
म्हिगः सोमवाः रिपोर्टस क्लबं ग्वसाःग्वःगु साक्षात्कार ज्याभ्वलय् न्वंवायेगु झ्वलय् माओवादीया नेता प्रकाशं अथे धयादीगु खः ।
गबलें त्याइमुखुगु जूसां याकःचा उम्मेदवार जूसां कांग्रेसया नेता रामचन्द्र पौडेलं उम्मेदवारी लितमकाया मुलुकयात असफलतापाखे ध्वाना यंकाच्वंगु धकाः नं वय्कलं धयादिल ।
नेपाली सेना व जनमुक्ति सेना समायोजन जुइ धुंकाः जक एकीकृत माओवादीया नेतृत्वय् सरकार दयेके बिइगु धकाः नेपाली कांग्रेसं सोच दयेकाच्वंगु हे आःया अवस्थाय् राजनीतिक गतिरोधया कारण खः धकाः दावी यानादिसें माओवादीया नेता प्रकाशं थुज्वःगु अवस्था जुल धाःसा जनआन्दोलन व जनयुद्धया उपलब्धि तनीगु अवस्था वइ मुलुक असफल राष्ट्र जुइ गृहयुद्धय् फसेजुइ वैदेशिक हस्तक्षेप अप्वया वइु धकाः नं धयादिल ।
भारतया हस्तक्षेप व विस्तारवादी नीतियात एकीकृत माओवादीं न्ह्याबलें नं बिरोध यानाच्वनी धयादिसें वय्कलं माओवादी चीन कार्डु प्रयोगया पक्षय् मदु धकाः स्पष्ट यानादिल ।
एकीकृत माओवादीया नेता नारायणकाजीं धयादिल 'माओवादी चीन व भारतयात बराबरया दुरीइ सम्वन्ध विकास यायेगु पक्षय् दु ।'
कांग्रेसं आःया अवस्थाय् माओवादीयात यथास्थितिया धारय् यंकेत कुतः यानाच्वंगु दु धयादिसें वय्कलं धयादिल माओवादी परम्परागत संसदीय व्यवस्थाया पक्षय् सहमति जुइमखु ।
वय्कलं संविधान निर्माणया सवालय् विवाद जुयाच्वंगु विषययात ज्यंकेगु नितिं माओवादीया नायः पुष्पकमल दाहाल प्रचण्डया नेतृत्वय् उच्च स्तरीय राजनीतिक कार्यदल दयेकूगु खँ न्ह्यथसें आः ११ न्हिया म्याद सहमतिया आधारय् थप यायेगु ज्या जुइ धुंकूगु जुयाः व ईया दुने गुलि सहमति जुइ अनं लिपा हाकनं म्याद थप यायेगु आवश्यकता मदु धकाः नं धयादिल ।
असहमतिया बुँदा फुक्कं छक्वलं सहमति जुइफैमखु ल्यं दुगु खँयात तयाः एकीकृत मस्यौदाया नितिं संवैधानिक समितिइ छ्वयेमाः, धयादिसें माओवादीया न्वकु प्रकाशं आःया कामचलाउ सरकारपाखें गुगु नं हालतय् बजेट हयेमज्यू धकाः धयादिल । प्रधानमन्त्रीया उम्मेदवारी लितकयाः न्हूगु हे प्रकि्रयां न्ह्याः वनाः याकनं हे न्हूगु सरकार गठन यायेमाः धकाः नं नेता प्रकाशं धयादिल ।
सरकार दयेके हे मफुगु अवस्थाय् छु जुइ धकाः न्यंगु न्ह्यसःया लिसलय् वय्कलं धयादिल उज्वःगु अवस्थाय् व हे इलय् निर्णय यायेगु जुइ ।
