न्हूदँ भव्यताया साथ हनेत रक्षामन्त्रीया इनाप
रक्षामन्त्री विद्यादेवी भण्डारीं नेपाल संवत् नेपाःया मौलिक संवत् जूगु धयादिसें थुकीया न्हूदँ भव्यताया साथ हने इनाप यानादीगु दु ।
एमाले येँ जिल्ला कमिटिं न्हूदँ ने. सं. ११३१या लसताय् सोमवाः येँय् याःगु बृहत भेलाय् न्ववानादिसें मन्त्री भण्डारीं नेपाल संवत्या प्रवद्र्धक शंखधर शाख्वाःयात नेपाःया राष्ट्रिय विभुति घोषणा यायेत एमालें तःधंगु योगदान म्हितुगु धयादिल ।
अथेहे मन्त्री भण्डारीं र्वतमान राजनीतिक गतिरोधया बाधक माओवादी जूगु द्वपं बियादिसें माओवादी लडाकुतय् व्यवस्थापन मजुइकं न्हूगु संविधान जारी जुइमफइगु धयादिल । उगु इलय् वय्कलं माओवादीयात मुल्यांकन यायेगु खँय् एमाले दुनेया निगू खेमा दुगु नं स्वीकार यानादिल ।
उगु भेलां नेपाल संवतय् ११३१ न्हूदँ हनेत निर्मल कुँइकेलया संयोजकत्वय् १,०५१ दुजः दुगु समिति गठन याःगु दुसाः न्हुदँ हनेगु ज्याझ्वः सफल यायेत थीथी गुंगू उपसमिति नं गठन याःगु दु ।
