घरेलुहिंसा म्हो मजूनि
येँ (झीगु स्वनिगः)
सन् २०१० सं ९८३ म्ह मिसा व मस्त घरेलु हिंसाया शिकार जूगु दु । सन् २००९ सं धाःसा ९६८ म्ह मिसा लिसे मस्तविरुद्ध घरेलु हिंसाया घटनात जूगु दु । प्रहरीया कथं चालु आर्थिक दँय् ३७६ म्ह मिसा व मस्त बलात्कारया शिकार जूगु दु । वंगु दँ थ्व ल्याः अप्वयाः ३९१ म्ह थ्यंगु दु ।
बेचबिखनय् लाःपिं मिसापिनिगु ल्याः नं खासै कमी वयेमफुगु प्रहरीया तथ्याङ्कं प्रष्ट रुपं क्यंगु दु ।
तथ्याङ्ककथं थ्व दँ १६१ म्ह मिसा व मस्त बेचबिखनया शिकार जूगु दु । थ्व ल्याः वंगु दँ १३९ म्ह दुगु खः ।
न्ह्यात्थेंज्याःगु शिक्षा व चेनताया ज्याझ्वः न्ह्याकूसा नं मचाया उमेरय् हे इहिपाः यायेगु प्रथा द्यूगु मदुनि । प्रहरीयाकथं थ्व दँ न्हय्म्ह मस्तय्गु मचाया उमरेय् हे इहिपाः जूगु दु जबकि न्हापाया दँ निम्हसिया जक जूगु खः ।
सामाजिक लिसे पारिवारिक डरया कारण इलय् उजुरी मयानाः आपालं मिसा लिसे मस्तय्सं न्याय कायेमखंगु प्रहरी प्रधान ज्याकूया प्रहरी नायब महानिरीक्षक पार्वती थापां धयादीगु दु ।
न्हापाया तुलनाय् थौंकन्हय् हिंसा पीडितत न्यायया नितिं प्रहरी दथुइ वयेगु क्रम अप्वयाः वःगु नेपाल प्रहरीं जानकारी ब्यूगु दु ।
