नेकपा एमाले व नेपाली कांग्रेस मू दोषी - किरण
येँ (झीगु स्वनिगः)
एकीकृत नेकपा माओवादीया वरिष्ठ न्वकु मोहन बैद्य किरणं राजनैतिक पंगः ताःहाकः जुयाच्वंगुलिइ नेपाली कांग्रेस व नेकपा एमाले मू दोषी जूगु बिचाः प्वंकादीगु दु ।
म्हिगः येँय् ग्वसाः ग्वःगु छगू साक्षात्कार ज्याझ्वलय् न्ववानादिसें न्वकु किरणं पंगः क्वचायेकेत कांग्रेस व एमालें बांलाक्क बिचाः यायेमाःगु धयादिसें सहमतिया नितिं माओवादी न्ह्याग्गु इलय् नं तयार दुगु स्पष्ट यानादीगु खः ।
वय्कलं कामचलाउ सरकारं जबरजस्ति बजेट हयेगु तयारी यायेगु नितान्त गलत जूगु वय्कःया बिचाः खः । गलत ढंगं बजेट हःसा अलोकतान्त्रिक जुइगु धयादिसें वय्कलं न्हूगु सरकार नीस्वना वहे सरकारं बजेट हयेमाःगु खँय् बहः बियादीगु खः ।
मेगु ब्यागलं प्रसङ्गय् न्वकु किरणं पार्टी नायः प्रचण्ड लिसेया पार्टी नेतापिनिगु चीन भ्रमण सांघाइ एक्स्पोया ज्याझ्वःकथं न्हापा हे क्वःछुइधुंकूगु स्पष्ट यानादीगु दु ।
वय्कलं चीन भ्रमण निगू देय् व चिनियाँ कम्युनिष्ट पार्टी व माओवादी दथुइया स्वापू भिंकेगु नितिं नं जूगु धयादीगु दु ।
