रक्तचन्दन अथें जुल

दोलखा (झीगु स्वनिगः)

वंगु दँ प्रहरी व एकीकृत नेकपा माओवादीया भातृ सङ्गठन वाइसीएलं बरामद यानाः लःल्हाःगु ५०० किलो स्वयाः अप्वः दुगु रक्तचन्दन जिल्ला वन ज्याकू दोलखाय् अथें थानाच्वंगु जानकारी ब्यूगु दु ।

अवैधरुपं चीनया स्वशासित क्षेत्र तिब्बतपाखे यंकेगु झ्वलय् दोलखाया उत्तरी क्षेत्रपाखे वंगु दँ बरामद याःगु ५२७ किलोग्राम रक्तचन्दन वन ज्याकूया गोदामय् थानाच्वंगु खः ।

जिल्ला अदालत दोलखां खुला न्ह्यःनिसें हे उगु रक्तचन्दन लिलाम यानाः मीत आदेश ब्यूसां नं नेपाल अन्तर्राष्ट्रिय साइटिस महासन्धिया दुजः दुगु कारण बिक्री वितरणय् समस्या वयाच्वंगु खः ।

साइटिस महासन्धिइ रक्तचन्दन लगायत बहुमूल्य वनस्पति लिसे जडीबुटी गुगु देय्पाखें आयात याःगु खः उगु हे देशय् लितः छ्वयेमाःगु प्रावधान दुगु खः ।

वन विभागं नापं बरामद जूगु रक्तचन्दन लिलाम बिक्रीया नितिं स्वीकृति बिइधुंकूसां नं साइटिस महासन्धिया कारण रक्तचन्दन लिलाम यायेत समस्या जूगु दोलखाया जिल्ला वन अधिकृत केदारनाथ दाहालं जानकारी बियादीगु खः ।
साइटिस सन्धिया हे कारण रक्तचन्दन मीमफूगु व रक्तचन्दन लिलाम बिक्री वा नष्ट यायेगु धइगु बारे वन मन्त्रालयलिसे लिपांगु खुसिइ स्वीकृति काइगु वन अधिकृत दाहालं धयादीगु दु ।

More Stories Like this