नेवाः भूमि लाका कायेगु तयारी
स्वनिगःयात छगू हे शहर दयेकेगु कानून
देशय् संघीय व्यवस्था लागू जुइगु तयारी जुयाच्वंगु इलय् लाक्क सरकारं उकिया अःखः नेवाःतय् बाहुल्यता दुगु स्वनिगःया स्वंगुलिं शहरयात छगू हे शहरया रुपय् विकास यायेगु अवधारणा सहित छगू बिस्कं कानून हयेत्यंगु दु । उकिया लागिं काठमाडौं उपत्यकाया शहरी विकास सम्बन्धी छगू विधेयक हे सदनय् दर्ता यायेधुंकूगु दुसा आः याकनं हे सदनं उकियात पारित नं यायेगु तयारी जुयाच्वंगु खँ सीदुगु दु ।
थ्व विधेयक पारित जुल कि स्वनिगःया येँ, यल व ख्वपयात छगू हे शहरया रुपय् विकास यायेगु लागिं छगू बिस्कं परिषद् हे दयेकी । काठमाडौं उपत्यका शहरी विकास परिषद धइगु नामं स्वनीगु थ्व परिषद्या अध्यक्ष भौतिक योजना तथा निर्माण मन्त्री जुइसा राष्ट्रिय योजना आयोगया उपाध्यक्ष थुकिया नं उपाध्यक्ष जुइ । थुकी स्वनिगःया स्वंगुलिं जिल्लाया जिविस व नगरपालिकातय्त दुजःया रुपय् जक दुथ्याकातःगु दु । परिषद्यात थुलि ब्यापक अधिकार बियातःगु दु कि थ्वं स्वनिगःया गुगुं नं लागाया जग्गा थः यत्थे अधिकरण यानाः कायेफु । तर थन शहरी विकास यायेगु लागिं थनया आदिवासी जनतालिसे छुं नं कथंया सल्लाह सहमति वा स्वीकृति कायेमाः धइगु छुं नं प्रावधान धाःसा उकी तयातःगु मदु ।
सरकारं हयेत्यंगु थ्व विधेयकयात स्वनिगःया नेवाः बुद्धिजीवीतय्सं धाःसा विरोध याःगु दु । थ्व विधेयक पारित जुल धाःसा स्वनिगलय् पिनेयापिं मनूत अझ व्यापक रुपं बढे जुयाः नेवाःत झन् हे अल्पमतय् लाः वनीगु बिचाः वय्कःपिंसं प्वंकादीगु दु ।
नेपाः राष्ट्रिय पार्टीया अध्यक्ष डा. केशवमान शाक्यं नेवाःतय्सं बाह्य रिंगरोडया जक विरोध यानाच्वना तर थ्व ला व स्वयां नं 'बाप' खः धयादीगु दु । नेवाः देय् दबूया पुलांम्ह नायः मल्ल के. सुन्दरं नेपाःयात संघीय व्यवस्थाय् यंकेगु धकाः तयारी हे जुयाच्वंगु इलय् थज्याःगु केन्द्रिकृत विधेयक हयेगुया छुं हे अर्थ मदु धासें थुकियात सदनं हे लित छ्वयेमाः धयादीगु दु । नेपाः राष्ट्रिय पार्टीया सभासद् बुद्ध साय्मिं संविधानसभाया नेवाः सभासद्तलिसे थुकिया बारे सल्लाह यानाः अन विरोध याकेत थम्हं पहल यायेगु बचं बियादीगु दु ।
संघीय व्यवस्थाय् जातीय स्वशासन अन्तर्गत नेवाःतय् जल, जमिन व जंगलया अधिकार माग जुयाच्वंगु इलय् नेवाःतय् भूमियात केन्द्रपाखें थः यत्थे प्रयोग याकीगु थ्व विधेयकयात सकल नेवाःतय्सं छप्पँ जुयाः विरोध यायेमाःगु बिचाः ज्यापु महागुथि येँ महानगर समितिया नायः मोहनकृष्ण डंगोलं प्वंकादीगु दु । सभासद् तीर्थराम डंगोलं जिउसा सर्वोच्चय् मुद्दा तयाः जूसां थ्व विधेयक रोके यायेमाः धयादीगु दु ।
