पर्यटन दँया नितिं

ख्वप (झीगु स्वनिगः)

पर्यटन दँ २०११ यात ताःलाकेत पर्यटन दँ ज्वःछि नगरकोटय् 'भिजिट नगरकोट' ज्याझ्वः न्ह्याकीगु जूगु दु ।

पर्यटकया गन्तव्य थाय् जुयाः वयाच्वंगु नगरकोटय् पर्यटन दँय् आपालं पर्यटक दुथ्याकेत भिजिट नगरकोट ज्याझ्वः न्ह्याकेत्यनागु नगरकोट नाल्दुम पर्यटन विकास समितिया छ्याञ्जे दीपक लामिछानें धयादीगु दु ।

समितिं भिजिट नगरकोट ज्याझ्वः न्ह्याकेगु नितिं छगू समिति नापं नीस्वनेधुंकूगु दु । नगरकोट क्षेत्रय् वःगु पर्यटकया समस्या थुइकेत समितिं पर्यटन पूर्वाधारया ग्वाहालिइ करिब न्यागू लाख तकाया लागतय् पर्यटकतय्त सुविधा सम्पन्न पर्यटन सूचना केन्द्र नापं पलिस्था यानाः न्हूगु भवन निर्माण याःगु दु ।

पर्यटकीय क्षेत्र नगरकोटयात मुख्य गन्तव्यस्थल दयेकेत नगरकोट वईपं न्हूपिं पैदलमार्गत मालेगु लिसे सुन्दरीजल - नगरकोट नगरकोट - धुलिखेल नमोबुद्ध - पनौती व नगरकोट - चाँगुनारायण पदयात्रा मार्गयात व्यवस्थित यायेगु ज्या नापं न्ह्याकूगु छ्याञ्जे लामिछानें धयादीगु दु ।

पर्यटकया आगमन अप्वयेकेत नगरकोट महोत्सव सांस्कृतिक ज्याझ्वः मेला घोडचढी साइक्लिङ जङ्गल सफारी जङ्गली जीवजन्तुया संरक्षण होमस्टे लगायतया ज्याझ्वः न्ह्यःने न्ह्याकूगु दु ।

नगरकोटय् पर्यटन दँ ज्वःछि न्हिं द्वःछि पर्यटक दुथ्याकेगु लक्ष्य काःगु समितिया नायः श्यामभक्त कायस्थं जानकारी बियादीगु दु ।

More Stories Like this