युद्ध पिपासु अमेरिका

विश्वय् सैनिक शक्ति व सामथ्र्यया मिखां दकले नम्बर वानय् लाःम्ह अमेरिकायात न्ह्याक्को हे प्रजातान्त्रिक धाःसां मध्यपूर्वया युद्धय् वइत युद्ध पिपासु कथं न्ह्यःने हःगु दु । सन् २००३ थुखे इराकय् आक्रमण याःसांनिसें थौंतक्कया दुने १९०००० मध्ये ६६ हजार ८२ म्ह सर्वसाधारण व्यक्तितय्त स्यानाब्यूगु दु ।

विकिलिक्स नांया वृटेनया छगू वेभसाइटं उगु गोप्य थीथी प्यंगू लाख गोप्य दस्तावेज वंगु शुक्रवाः सार्वजनिक याःगु खः । तर अमेरिकी विदेशी मन्त्री हिलारी क्लिन्टन लगायत सरकारी प्रतिनिधिपिंसं उगु दस्तावेजप्रति तःधंगु आपत्ति प्वंकुसें विरोध याःगु दु । थुकिं व्यक्ति पिनिगु तःधंगु क्षति जुइगु ख्याच्वः ब्यूगु दु । अमेरिकी जनताया इच्छा विपरित युद्ध लादय् यानाः अमेरिका युद्धपिपासुया ख्वालं हानं छक्वः गम्भीर द्वपं ब्यूगु दु ।

हाल अमेरिकां इराक अफगानिस्तान लगायत मध्यपूर्वय् सत्तापक्षया वकालत यानाः नाटो अन्तर्गत द्वलंद्वः अमेरिकी सेनां द्वलंद्वः गैरसैनिक व्यक्तितय्त स्यानाच्वंगु व उकी अमेरिकी सेनाया प्रत्यक्ष अप्रत्यक्षरुपं ल्हाः दुगु खँ प्रचारय् वयेवं विश्वन्यंक अमेरिकी सेनाया आलोचना जुइगु स्वभाविक खः । अथेला आणविक ल्वाभः दु धकाः द्वपं बियाः इराकय् हस्तक्षेपय् कुहाँवःम्ह अमेरिकां अनया पूर्व राष्ट्रपति सद्दाम हुसेनयात ज्वनाः सार्वजनिक मुद्दा चलय् यानाः फाँसी ब्यूगु वइगु भूल जूगु दु । इराकय् आणविक ल्वाभः मखु चिकंया खानीइ थःगु प्रभुत्व कायम यायेत व ताःलाःगु खः ।

इराक युद्धय् अमेरिकी सेनायाम्ह उपस्थिति व स्वीकार्य वातावरणय् गैरसैनिकतय्त अमानवीयरुपं स्यायेगु याःगु घटनात नं सार्वजनिक जूगु खः । ६६ द्वः गैरसैनिकतय्त करेन्टं ज्वंकेगु पितंचा चायेगु एसिडं ख्वाः व म्हय् च्याकेगु नाङ्गा तयाः यख्खाना दायेगु सम्वेदनशील अंगय् मिं पुकेगु यायां दा जक दायाः नं स्याःगु खँ प्रकाशित जूगु गोप्य दस्तावेजं स्पष्ट क्यनाब्यूगु दु । थ्व बाहेक अपहरण बलात्कार व म्वाःसां म्वाःसां गोलीं कयेकाः स्याःगुया यकिन तथ्यांक संलग्न मजूगु व मयाःगु खँ नं प्रतिवेदनं स्पष्ट याःगु दु ।

अमेरिकी सैनिकतय्सं न्ह्याक्को हे इन्कार याःसां गोप्य प्रतिवेदनत सार्वजनिक जुइवं दोषीतय्त कार्यवाही यायेगु खँ बाध्यतावश पित हःगु खःसां वर्बरता व अमानुसिक रुपं गैर सैनिकतय्त स्यायेगु ज्याय् अमेरिकां थौंतक्क स्पष्ट नवायेगु आँट यायेमफुनि ।

सन् २००७ या जुलाइपाखे छगः हेलिकप्टरं आक्रमण याःबलय् सीपिं २६ म्ह मध्ये बच्छि गैर सैनिकतय्त स्याःगु खँ नं पुष्टि जुइधुंकूगु दु । थुकी पत्रकारत व मस्त नं लाःगु खः । प्रकाशित जूगु दस्तावेज कथं सन् २००४ निसें सन् २००९ तक्कयादुने इराकय् जूगु हत्या हिंसा १ लाख ९ द्वः मनूत सीगु खः । उकिसनं ६६ द्वः गैर सैनिक व २३ द्वः व ९ सय ८४ शत्रुत सीगु खः ।

थुकिं भियतनाम युद्ध लिपा नं अमेरिकाया युद्ध पिपासु न्हंगु मदुनि । विश्वन्यंक मानव अधिकारया ध्वांग पुया जुइम्ह अमेरिकां गैर सैनिकतय्त स्यायेगु ज्याय् निरन्तरता बियाः गुगु मानव अधिकारया वकालत यानाच्वंगु खः - खँ थुइकेत थाकुइ मखु ।

More Stories Like this