एमालेया नायः खनालया खँ नक्कली - पौडेल
येँ (झीगु स्वनिगः)
नेपाली कांग्रेसया संसदीय दलया नेता रामचन्द्र पौडेलं एमालेया नायः झलनाथ खनालया धापू नक्कली जूगु टिप्पणी यानादीगु दु ।
एमालेया नायः खनालं शनिवाः जक संचारकर्मीतलिसे खँल्हासें राष्ट्रिय सहमति कायम जुल धाःसा सरकारया नेतृत्व यायेत थः तयार दु धकाः न्वंवानादीगु खः ।
म्हिगः आइतवाः पत्रकारतलिसे खँल्हासें नेता पौडेलं अथे खनालया खँ नक्कली जूगु दावी यानादीगु खः । वय्कलं प्रधानमन्त्री जुइ दत धाःसा न्ह्याम्ह हे प्रधानमन्त्री जुइत तयार जुइ धकाः तकं धयादिल । कांग्रेसया नेता पौडेल सहमतिया आधारय् हे न्ह्याः वनेमाः धकाः नं बः बियादिल ।
लुमंकेबहःजू प्रधानमन्त्रीया नितिं पौडेल याकःचा उम्मेदवार जुयाच्वंगु दुसां त्याइगु सम्भावना आः तक मदु अले दुईतिहाइ बहुमत सभासदतय्सं वय्कःयात उम्मेदवारी लितकयाः सहमतिया लुखा चायेकेत इनाप यानाः चुनाव तकं बहिस्कार यानाः वयाच्वंगु दु ।
