कार्यदलया म्याद ११ न्हु थप सहमति जूगु खँ २७ दलया मुँज्याय् न्ह्यब्वल थौं ग्वहालि पुचःया मुँज्या

येँ (झीगु स्वनिगः)
संघीय गणतान्त्रिक नेपाःया न्हूगु संविधान निर्माणया झ्वलय् दलतय्गु दथुइ जुयाच्वंगु विवाद ज्यंकेगु निितं नीस्वंगु उच्च स्तरीय राजनीतिक कार्यदलया म्याद ११ न्हु थप याःगु दु । म्हिगः आइतवाः न्हूबानेश्वरया संविधानसभाया भवनय् जूगु संविधानसभाया नीन्हय्गू हे दलया नेतातय्गु मंकाः मुँज्यां अथे कार्यदलया म्याद थप याःगु खः । उगु मुँज्याय् कार्यदल व कार्यदलया निितं ग्वहालि पुचलं याःगु प्रगतिया विवरण एकीकृत माओवादीया नेता नापं ग्वाहालि पुचःया दुजः देवप्रसाद गुरुङं न्ह्यब्वयादीगु खः ।

आः तकया दुने ग्वहालि पुचः व कार्यदलं सहमतिइ थ्यंकूगु खँ धायेबलय् संघीय व्यवस्थापिकाय् प्रतिनिधित्वया आधार धैगु जनसंख्या व भूगोल यायेगु प्रदेशया मुख्य मन्त्रीयात अविश्वासया प्रस्ताव तयेमाल धाःसा वैकल्पीक मुख्य मन्त्रीया प्रस्ताव तकं यंकेमाः धाःगु यात चीकेगु स्थानीय निकायलय् तकं कार्यपालिका व्यावस्थापिका व न्यायपालिका दयेकेगु खः । उगु कथंया सहमतिया प्रस्तावयात २७ दलया मुँज्याय् न्ह्यब्वयेगु ज्या जूगु खः । न्हूगु संविधान निर्माणया निितं संविधानसभाया विषयगत समितितपाखें तयार याःगु थीथी प्रतिवेदनयात कयाः दलतय्गु दथुइ असहमति ब्वलना मुक्कं निसः व पीछगू न्ह्यसः ब्वलनाच्वंगुयात सहमति हयाः गुलि फु उलि न्ह्यसः म्हो यायेगु निितं धकाः दलतय्सं अथे उच्च स्तरीय राजनीतिक कार्यदल नीस्वंगु खः ।
कार्यदलं अझ नं अप्वः सहमतिइ हयाः न्ह्यसः म्हो यायेगु निितं अझ अप्वः ई माःगु तायेका म्हिगःया मुँज्याय् प्रस्ताव तःगु इलय् गुिलं गुिलं दलया नेतातय्सं म्याद थप यायेगु आवश्यकता मदु धकाः तर्क तःगु जूसां अन्ततः न्हूगु संविधानया निितं सहमतिया विकल्प मदुगु जुयाः २७ दलया हे सहमति उगु कथं ११ न्हु प्याद थप यायेगु ज्या जूगु खः ।
आः वइगु कार्तिक १८ गते हाकनं २७ दलया हे मुँज्या च्वनेगु कथंया सहमति नं जूगु दु । उगु मुँज्याय् कार्यदलपाखें याःगु प्रगतियात कयाः सहलह ब्याकेगु नं याइ धकाः छम्ह नेतां धयादीगु दु ।

वंगु २५ गते संविधानसभाया नायः सुवास चन्द्रं नेम्वाङया कुतलय् नीन्हय्गू हे दलया मंकाः मुँज्या च्वनाः १२ न्हुया दुने विवाद जुयाच्वंगु ज्यंकेत माःगु कथं कुतः यायेत धकाः न्हय्म्हेसिया उगु कार्यदल नीस्वंगु खः । कार्यदलया कजिया रुपय् एकीकृत नेकपा माओवादीया नायः पुष्पकमल दाहाल प्रचण्डयात ल्यःगु खः । कार्यदलय् नेपाली कांग्रेसया संसदीय दलया नेता रामचन्द्र पौडेल नेकपा एमालेया नायः झलनाथ खनाल नेपाल मजदुर किसान पार्टीया नायः नारायणमान विजुच्छे नापं थीथी दलया नेतात दुजः जुयादीगु खः ।
अनंलिपा उगु कार्यदलयात ग्वाहालि यायेगु निितं धकाः हाकनं न्हय्म्हेसिया हे ग्वाहालि पुचः तकं नीस्वनाः ज्या न्ह्याकूगु खः ।
थ्व हे झ्वलय् न्हूगु संविधान निर्माणया सवालय् ब्वलनाच्वंगु विवादयात ज्यंकेत थौं कार्यदलया ग्वहालि पुचःया मुँज्या थौं च्वनीगु जूगु दु । थौं ११ बजेनिसें च्वनीगु उगु मुँज्याय् मौलिकहक व निर्देशक सिद्धान्त समिितं तयार याःगु प्रतिवेदनयात कयाः सहलह जुइ धकाः उगु पुचःया दुजलं जानकारी बियादीगु दु ।
न्हूगु संधिवान निर्माणया निितं दलतय्गु दथुइ कार्यकारी अधिकार राष्ट्रपतियाके ला कि प्रधानमन्त्रीयाके मताधिकार १६ दँय् ला कि १८ दँय् संविधानसभाया ब्याख्या सर्वोच्चं यायेगु ला कि व्यवस्थापिका संसदं निर्वाचन प्रणाली छुकियात नालेगु संघीय गणतान्त्रिक नेपाःया प्रदेशत गुलि दयेकेगु प्रदेश निर्माणया आधारत छु छु दयेकेगु नापं नापं थीथी विषययात कयाः ब्वलनाच्वंगु यक्व हे न्ह्यसःत म्हो यानाः सहमतिया आधारय् वनेमानीगु अवस्था दु ।