स्वंगू करोड थ्यंगु नेपाःया जनसंख्या

देशय् न्हूगु जनगणना कायेगु तयारी जुयाच्वंगु इलय् लाक्क राष्ट्र संघया छगू निकायं नेपाःया जनसंख्या थ्यंमथ्यं स्वंगू करोड थ्यनाच्वंगु तथ्यांक सार्वजनिक याःगु दु। सम्भवतः आः काइगु न्हूगु जनगणनां देय्या जनसंख्या स्वंगू करोड पुला वंगु हे क्यनीगु जुइफु। नेपाःया जनसंख्या अप्वयां तुं वनाच्वंगुया थ्व छगू ज्वलन्त दसि खः ।

युरोपया आपालं देय् गन विकासया गति तीव्र दु अन जनसंख्या तसकं कम। अथे खःसां नं विश्वय् वयाच्वंगु न्हून्हूगु कथंया आर्थिक संकटं यानाः आः दुगु कम जनसंख्या नं अप्वः थें खने दयाच्वंगु दु। थज्याःगु अवस्थाय् नेपाः थेंज्याःगु गरीब देय्या लागिं ला अप्वयाच्वंगु जनसंख्या अभिषाप हे साबित जुइगु खँय् शंका मदु। नेपालय् शिक्षित, सम्पन्न व सःसिउपिं मनूतय्सं कम जक मचा बुइकेगु, अले गरीब, अशिक्षित पुचलं अप्वः मचा बुइकेगु ज्या यानाच्वंगु दु, देय्या आर्थिक विकासया लागिं थ्व अझ मेगु जटिल प्रकृतिया जनसंख्या वृद्धि जुयाच्वंगु दु ।

खतुं थौंकन्हय् गामय् स्वः वन धाःसा ल्याय्म्हत धइगु हे खने मदुगु अवस्था दु। ल्याय्म्ह धाक्व विदेशय् श्रमिक जुयाः वनाच्वंगु दु। उकिं नेपालय् अप्वयाच्वंगु जनसंख्यां ब्वलंकीगु खराब लिच्वःया धक्का कम जक महसुस जुइगु याः। तर थःगु देशया जनतायात कर्पिनि देशया भरोसाय् त्वःता तयेगु बांलाःगु संकेत धाःसा मखु। छुं जुयाः निगू देय्या स्वापू स्यनाः अनया थःपिनि नागरिक लिहां वयेमाःगु अवस्था जुल धाःसा उकिं देशय् तःधंगु हे विकृति ब्वलंकी। उकिं थौंया ई नेपाः थेंज्याःगु देशय् जनसंख्यायात अझ नियन्त्रण यायेगु हे प्रमुख आर्थिक कार्यक्रम जुइमाःगु खनेदु ।

More Stories Like this