क्यानाडाय् कुमारी

शीला साय्मि

विश्वय् हे ज्वः मदुम्ह धकाः म्हसीका वयाच्वंम्ह जीवित देवी कुमारीया बारे गलत प्रचार जुयाच्वंगुयात भिंकेगु निंतिं हे भाजु प्रिनाराज जोशी न्ह्यचिलादीगु खः। थःगु धर्म संस्कृति व परम्परायात थःगु नुगः स्वयां नं अप्वः माया यानादीम्ह वय्कलं श्री कुमारी बारे पूवंक हे डकुमेन्ट्री तयार यानाः नेपाः जक मखु दक्षिण एशियायात हे गौरवान्वित यानादीगु दु। वय्कलं तयार यानादीगु कुमारी विषयक थुगु डकुमेन्ट्री क्यानाडाय् जुयाच्वंगु आदिवासी फिल्म महोत्सवय् म्हिगः प्रदर्शन जूगु दु। थ्व स्वयां न्ह्यः वय्कलं दयेकादीगु तुइसिं व ग्वाय्मदु नांगु फिल्म नं चर्चित जूगु खः ।

म्हीगंनिसें प्यन्हुयंक क्यानाडाय् जुइगु आदिवासी फिल्मी महोत्सव फिल्म फेस्टीभलय् क्यनेगु निंतिं वय्कलं दयेकादीगु 'कुमारी : द लिभिंग गडेस' डकुमेन्ट्री ल्यःगु खः। उगु फिल्म महोत्सवय् क्यनेत विश्वन्यंकंभनं द्वलंद्वः आदिवासी फिल्मत वःगु खः। उकी मध्ये मुक्कं ८० गू जक फिल्म छनौट जुल। दक्षिण एशियां छगू हे जक फिल्म छनौट जूगुली जोशीजुं दयेकादीगु कुमारीया डकुमेन्ट्री लाःगु खः। उगु डकुमेन्ट्रीया निर्माता व निर्देशक वयकः हे जुयादी ।

थ्व डकुमेन्ट्री दयेकेत निद न्ह्यवंनिसें वय्कलं कुमारी माजुया विषयय् अनुसन्धान यानादीगु खः। अनुसन्धान लिपा स्त्रिप्ट तयार यानादिल। पर्व पतिकं कुमारी माजु कुमारी छेँनं पिहां बिज्याइगु इलय् व कुमारी छेँ दुनेया गतिविधिइ ध्यान तयाः छगू हे पर्व तुते मजुइक भिडियो कायेगु ज्या यानादिल। थुकिया निंतिं कुमारी छेँया चिताइदार व वर्तमान कुमारीया छेँजःपिं नाप क्वात्तुक्क स्वापू तयादिल। थाकु अःपु व लाःमलाः वय्कलं गबलें धयामदी ।

डकुमेन्ट्री निर्माणया निंति न्याम्ह पासापिं वय्कलं साथ कयादी। क्यामराया निंतिं सुरेश श्रेष्ठ, प्रदिप पुडासैनी, प्रल्हाद लामिछाने, स्त्रिप्ट च्वयेत प्रजिता प्रधान, इडिटिङ्गया निंतिं श्रीराम महत। वय्कःपिं खुम्हेसिया पुचः जानाः पर्फेक्ट मिडिया प्रोडक्सपाखें उगु डकुमेन्ट्री निर्माण जूगु खः। थाकु व अःपुया खँ ल्हायेबलय् कनादी, 'ज्या यायेबलय् थाकु ला जु हे जुइ। थुगु ज्याय् दकलय् थाकुगु धइगु हे क्यामरा मसंक भिडियो खिचे यायेगु खः। उकिसनं जात्राया इलय् कुमारीमाजुया ख्वाःपाः बांलाक वयेकेमाःगु डकुमेन्ट्री निर्माणया निंति तःधंगु चुनौती खः ।'

थुकी जूगु खर्चया ल्याःचाः वय्कलं यानामदी। थःपिंसं यानागु अथक प्रयास व उद्देश्य सफल जुल, साप लय्ताः। सफलता वय्कःपिनिगु जक जूगु मखु नेवाःतय्गु, नेपाः देय्यागु अझ दक्षिण एशियायागु हे जूगु दु ।

देशय् व देशंपिने कुमारीया विषयय् गुकथं भ्रामक खँत प्रचार जुयाच्वंगु खः उकियात लिसः बीगु हे वास्तवय् थ्व डकुमेन्ट्री निर्माणया मू आज्जु खः। कुमारीमाजु ल्यइगु बखतय् खिउँगु क्वथाय् तयाः मिखा प्वालां कंगु म्येय्छ्यों चाकःलिं कुमारी जुइम्ह मचायात दथुइ तयाः गुम्ह मचा मग्यात वयात जक कुमारी याइ धइगु भ्रामक प्रचारयात वय्कलं थुकी खण्डन यानादीगु खः। कुमारी जुइम्ह मचा राज्य व राष्ट्राध्यक्षया जातःलिसे तूम्ह जुइमाः, स्वम्हेसितं जातः मिले जुल कि अले कुमारी जुइम्ह मचाया ग्रहदशां देशय् भिं जुइगु जुल कि उम्ह मचायात कुमारीया निंति छनौट याइगु संस्कारयात थुगु डकुमेन्ट्रीं बांलाक हे क्यना बिउगु दु ।

अथे हे थौंकन्हय् कुमारीमाजुया बाल अधिकार हनन जुल धइगु खँयात कयाः नं बय्बय् यानाच्वंगु दु। थुकियात नं वय्कलं थःगु डकुमेन्ट्री मार्फत तथ्यहिन धकाः पुष्टि यानादीगु दु। गुम्ह मचाया नामय् बसन्तपुली कुमारी छेँ छखां दु व मचाया बाल अधिकार गुकथं हनन जुइ? गुम्ह मचाया दर्शन यायेत राष्ट्राध्यक्ष तक नं कुमारी छेँय् थ्यंक वयेमाः, रथ अलग्ग दु, आसन अलग्ग दु अले लुँया �याः नापं लु�या खः तक नं अलग्ग दु धाःसा विश्वय् व थें भाग्यमानीम्ह मचा सु दइ? खय्त ला कुमारी दछिया भिंस्वक्वः जक औपचारिक रूपं कुमारीछेँनं पिहा बिज्याइ। नेवाः संस्कृतिइ थुकथं जुयाच्वंगु आक्रमणयात पनाः पर्यटन वर्ष २०११ सफल यायेगु समेत वय्कःया आज्जु खः।
वंगु अगष्टय् जूगु इमाजिनेटिभ फिल्म फेस्टीभल जुरीं आदिवासीतय्गु विषयय् मुद्दा हे तयाः दयेकातःगु फिल्म महोत्सवया निंति थ्व डकुमेन्ट्री छनौट याःगु खः। कुमारी विश्वया निंतिं हे छगू चिउताःया विषय खः। अमेरिका, ब्राजिल, न्यूजिल्याण्ड लगायत झिस्वंगू देय्या निर्माता, निर्देशक, एरेन्जर व कलाका च्वनाः शर्ट मुभि व लंग मुभि मध्ये नं स्टोरी व स्त्रिप्टया गहन अध्ययन यानाः थुगु डकुमेन्ट्री छनौट याःगु खः। थुकी वय्कलं मुक्कं च्यागू मिनेटया दुने कुमारी माजुया दक्व हे विषय समावेश यानादीगु दु। नापं सकसिनं थुइगु व अःपुइगु कथं विश्वया गुगुं नं भाषा मछ्यसें सांगीतिक भाषा (म्यूजिक) छ्यलादीगु दु। थौंकन्हय् वय्कः हाकनं ३०/४० मिनेटया कुमारीया हे विषयय् ताःहाकःगु डकुमेन्ट्री दयेकेगुपाखे व्यस्त जुयादीगु दु ।

म्हिगः अक्टोबर २३ तारिख कुन्हु क्यानाडाया टोरन्टो अल ग्रीन थियटरय् थ्व डकुमेन्ट्रीया ब्वज्या जुल। अक्टोबर १० निसें २४ तक क्यानाडाया उगु थियटर विश्वय् हे आकर्षकया केन्द्र जुयाच्वंगु दु। नेपाःया संस्कृति पिज्वःगु नेपाःया धार्मिक सहिष्णुतां भय् बिउगु नेपाःया आस्थाया द्यः कुमारीमाजु विषयय् निर्माण जूगु 'कुमारी : द लिभिङ गडेस' नांगु थ्व डकुमेन्ट्रीं विश्वया हे मिखा नेपाःपाखे साला बीगु अनुमान यायेफु। विश्वया आपालं आदिवासीतसें नापं सेलेक्सन कमिटीं तक नं न्हापया सिरपाः त्याकेफु धकाः थ्व डकुमेन्ट्रीयात स्वयाच्वंगु दु। यदि महोत्सवय् थ्व डकुमेन्ट्रीं छुं नं कथंया सिरपाः त्याकल धाःसा उकिं निर्माता जोशीजु जक मखु सकल नेपाःमियात हे गर्वित याना बीगु खँय् शंका मदु ।

More Stories Like this