कार्यदलया म्यादय् विवाद
झिंनिन्हुया कार्यदलय् छगू जक बुँदाय् सहमति / थौं कार्यदलया अन्तिम न्हि
येँ (सन्ध्या टाइम्स)/संविधान च्वयेगु ज्याय् वयाच्वंगु समस्या समाधान यायेत नीस्वंगु कार्यदलया म्याद हानं थपे यायेगु वा मयायेगु धइगु खँयात कयाः दलतय् दथुइ विवाद पिहां वःगु दु। थौं उगु कार्यदलया म्याद थौं क्वचायेत्यंगु दुसा थुकिया म्याद तनेगु वा मतनेगु धइगु खँयात कयाः थौं च्वंगु २७ दलया बैठकय् विवाद पिहां वःगुलिं निर्णय याये मफयाच्वंगु खँ सीदुगु दु ।
संविधानसभा भवन न्हू बानेश्वरय् जूगु उगु बैठकय् कार्यदलं आः तकया दुने याःगु ज्या, सहमति नापं थीथी पक्षयात कयाः सहलह ब्याकेगु ज्या जूगु खः। कार्यदलं संविधान च्वज्याय् वयाच्वंगु विवाद ज्यंकेत अझ ई थप यायेमाःगु प्रस्ताव अन तःगु खः। तर उकी फुक्कं दल सहमत मजूगु कारणं म्याद तनेगु खँय् विवाद पिहां वःगु दु ।
नेपाली कांग्रेस नेता रामचन्द्र पौडेल, एमालेया अध्यक्ष झलनाथ खनाल, नेमकिपाया अध्यक्ष नारायणमान बिजुक्छे नापं न्हय्म्ह दुजः दुगु उगु कार्यदलया कजि व माओवादी अध्यक्ष प्रचण्ड धाःसा थ्व इलय् चीन भ्रमणय् वनाच्वंगु दु। उकिं थौंया बैठकय् कजि हे मदयेक च्वनाच्वंगु खः। वंगु २५ गते च्वंगु नीन्हय्गू दलया बैठकं मुक्कं १२ न्हु दुने विवाद ज्यंकेगु ताः तयाः उगु कार्यदल नीस्वंगु खः। लिसें उगु कार्यदलयात ग्वाहालि यायेगु कथं न्हय्म्हेसिया हे छगू ग्वाहालि पुचः नं नीस्वंगु खः ।
कार्यदल स्वनाः विवाद ज्यंकेगु ज्या याःसां उकिं वंगु झिंनिन्हुया दुने मुक्कं छगू हे जक बुँदाय् सहमति कायम याये फुगु खः। कार्यदलपाखें केन्द्र, प्रदेश व स्थानीय निकास यानाः स्वंगुलिं थासय् ब्यवस्थापिका, कार्यपालिका व न्यायपालिका दयेकेगु धइगु छगू बुँदाय् जक सहमति दयेकेत सफल जूगु दुसा व बाहेक ग्वाहालि पुचःया बैठकय् प्रदेशय् छगू जक संसद तयेगु धइगु सहमति जूगु खः। तर उकी छम्ह दुजलं विरोध प्वंकेवं व नं विवादय् लानाच्वंगु दु। सूत्रं धाः कथं थौं न्हिनय् तक नं कार्यदलया म्याद थपे यायेगु बारे बैठकं छुं निर्णय मयाःनि ।
