यलय् न्हूदँया मंकाः ग्वसाः खलः नीस्वन
यल (सन्ध्या टाइम्स)/नेपाःया राष्ट्रिय संवत् नेपाल संवत् ११३१ तःजिक हनेगु नितिं यलया नेपालभाषा मंकाः खलःया ग्वसालय् म्हिगः छगू भेलाया दथुइ नेपाल संवत ११३१ न्हूदँया लसताय् सांस्कृतिक जुलुस मंकाः ग्वसाः खलः नीस्वंगु दु ।
मंकाः खलः यल, ज्यापु समाज यल व नेवाः स्वायत्त राज्य मंकाः संघर्ष समिति यल दुथ्याकाः मंकाः खलःया संयोजन समिति नीस्वंगु खः। उगु मुँज्यां थुगुसी न्हूदँ कुन्हु (कार्तिक २१ गते) मंगःया कात्ति दबुलिं सांस्कृतिक जुलुस पिकायेगु क्वःछिउगु खः। अथे हे कोपिला मचा पुचःपाखें क्वःपुजा कुन्हु (१८ गते) किपा धेधेबल्लाः कासा, खिचा पुजा कुन्हु (१९ गते) यलया दुपाः त्वालंनिसें पूच्वय् तक सुकू लानाः सुकू नखः न्यायेकेगु व लक्ष्मीपुजा (२० गते) कुन्हु सांस्कृतिक ब्वज्या याइगु जूगु दु ।
उकथं रोट्य्राक क्लब अफ यल, रोट्य्राक क्लब अफ ललितपुर, रोट्य्राक क्लब अफ पाटन, लियो क्लब अफ मणिगल व पाटन जुनियर जेसीसया मंकाः ग्वसालय् लक्ष्मी पुजा कुन्हु सांस्कृतिक ब्वज्या व मैनमतयाः याइगु जूगु दु ।
