२७ दलं म्याद थप याइगु
येँ (झीगु स्वनिगः)
क्वःछिनातःगु इलय् हे न्हूगु संविधान निर्माण यायेगु नितिं संविधानसभाय् दुथ्याःगु नीन्हय्गु हे दलं विबाद ज्यंकेत दयेकूगु उच्च स्तरीय राजनीतिक कार्यदलया म्याद थप याइगु जूगु दु ।
थौं च्वनीगु नीन्हय्गू दलया मुँज्याय् उगु कथं कार्यदलया म्याद थप यायेगु प्रस्ताव यंकी धकाः कार्यदलयात ग्वहालि यायेगु नितिं नीस्वंगु ग्वहालि पुचःया छम्ह दुजलं धयादीगु दु ।
कार्यदलयात थौं आइतवाः तकया म्याद बियातःगु नापं आः तकया दुने यक्व हे खँय् दलतय्गु दथुइ सहमति ब्वलंके मानिगु जुयाः हे अथे म्याद थप याइ धकाः नं दावी यानादीगु खः ।
कार्यदलपाखें आः नेपालय् केन्द्रीय सरकार प्रदेशया सरकार नापं स्थानीय सरकार दयेकेगु धकाः सहमति ब्वलंके धुंकूगु दु ।
कार्यदलं न्हूगु संविधानय् आः केन्द्र प्रदेश व स्थानीय निकायसं व्यवस्थापिका कार्यपालिका व न्यायपालिका स्वंगुलिं तयेगु धकाः खँ क्वःछिइ धुंकूगु दुसा प्रदेशय् छगू जक ब्यवस्थापिका संसद दयेकेगु धकाः तकं सहमति ब्वलंके धुंकूगु दु । व फुक्कं सहमतियात अनुमोदन यायेगु कथं थौंया नीन्हय्गू दलया मुँज्या न्ह्यब्वइगु जूगु दु ।
अथे हे यक्व हे खँय् सहलह ब्याकाः सहमति यायेमानीगु जुयाः हे थौंया मुँज्याय् अथे कार्यदलया म्याद थप यायेगु प्रस्ताव तयेत्यंगु खः धकाः धाःगु दु ।
मुक्कंयाना न्हय्म्ह दुजः दुगु उगु कार्यदलय् एकीकृत माओवादीया नायः पुष्पकमल दाहाल प्रचण्ड कजि जुयादीगु दुसा दुजलय् कांग्रेसया संसदीय दलया नेता रामचन्द्र पौडेल एमालेया नायः झलनाथ खनाल नेपाल मजदुर किसान पार्टीया नायः नारायणमान विजुच्छे नापं मेमेगु दलया नेतात च्वनादीगु दु ।
