अन्ततः संविधानय् ध्यान केन्द्रित
कार्यदलया प्रस्ताव ७ गते २७ दलया मुँज्याय् यंकीगु
येँ (सन्ध्या टाइम्स)/न्हूगु संविधान निर्माणय् वयाच्वंगु समस्या समाधान यायेत गठन याःगु उच्च स्तरीय राजनीतिक कार्यदलया बैठक थौं च्वनीगु जूगु दु।
थौं सनिलय् च्वनीगु उगु बैठकय् ग्वाहालि पुचःपाखें तयार याःगु थीथी विषययात कयाः सहलह ब्याकेगु नापं वइगु ७ गते आइतवाः च्वनीगु नीन्हय्गू दलया पूर्ण बैठकय् प्रस्ताव यंकेगु तयारी याइ धाःगु दु ।
ग्वाहालि पुचलं तयार याःगु विषयत कार्यदलय् यंकीगु अले कार्यदलय् सहमति जूगु खँ २७ दलया मंकाः मुँज्याय् यंकाः जक अन्तिम रुप बीगु याइ। म्हिगः च्वंगु ग्वाहालि पुचःया मुँज्यां प्रदेशय् छगू जक सदन दयेकेगु धकाः खँ क्वःछिउगु खःसा उकियात कयाः थौं कार्यदलय् सहलह ब्याकीगु जूगु दु। अथे हे विवाद जुयाच्वंगु मताधिकार प्रयोगया बारे नं थौं सहलह जुइ धकाः धाःगु दु। एकीकृत माओवादीं १६ दँय् हे नागरिकता काये दइगु जुयाः अबलय् निसें हे मतदान याये दयेमाः धकाः अडान तया वयाच्वंगु दुसा मेमेगु दलं धाःसा आः थें हे १८ दँय् जक मतदान यायेगु अधिकार बीमाः धकाः अडान तया वयाच्वंगु दु ।
विवादित विषययात कयाः सहमति ब्वलंकाः नीन्हय्गू दलया मुँज्याय् पेश यायेगु निंतिं उच्चस्तरीय राजनीतिक कार्यदलयात भाला बियातःगु खः। मोहनि नखः न्ह्यः २७ दलया मुँज्या च्वनाः न्हय्म्हेसिया उच्चस्तरीय कार्यदल दयेकेगु धकाः सहमति जूगु खःसा लिपा उगु कार्यदलया संयोजक कथं एकीकृत माओवादीया अध्यक्ष प्रचण्डयात ल्यःगु खः ।
