क्वाठण्डौंय् विराट
ख्वप(सन्ध्या टाइम्स)/पीगुक्वःगु विराट नेपालभाषा साहित्य सम्मेलन क्वाठण्डौं त्वालय् कवि डा. योगेन्द्र प्रधानं उलेज्या यानादिल। नसंचा धिमे खलकं धिमे बाजं थानाः उलेज्या जूगु उगु ज्याझ्वलय् विराटया संस्थापक दुजः रत्नगोपाल साँय्जूं आः नेवाःत राजनीतिक पहिचानया लागिं दनेमाः धासें विराट संघर्ष व आन्दोलनया प्रतीक खः धयादिल ।
राष्ट्रिय गान व नेवाः राज्यया गान न्यंकाः शुरु याःगु ज्याझ्वलय् थुगुसीया एसएलसीइ नेपालभाषा विषयय् दकलय् अप्वः ल्याः हयाः पास जूम्ह परोपकार उच्चमाविया रोशन महर्जनयात विराट गुथिया नायः त्रिरत्न शाक्यं विराट सिरपाः लःल्हानादिल ।
'जातीय स्वतन्त्रतायात क्वत्यलाः राष्ट्रया उत्थान जुइ फइ मखु' धइगु नारा थ्वयेकाः न्ह्याःगु न्हापांगु न्हिया उगु ज्याझ्वः विराट गुथिया न्वकु लोकेन्द्र बज्राचार्यया सभापतित्वय् जूगु खः ।
ज्याझ्वलय् पाहां साहित्यकारपिं कथं डा. योगेन्द्र प्रधान, कवि पूर्णबहादुर बैद्य, नारद बज्राचार्य, भगतदास श्रेष्ठ, कृष्णभक्त बोडे, हृदयप्रसाद मिश्र, कृष्णमोहन जोशी, सानुराजा शाक्य, गोविन्दमान श्रेष्ठ, त्रिरत्न शाक्य व शाक्य सुरेनपिंसं च्वसु न्यंकादीगु खःसा रोशनकुमार राजभण्डारी, राजेन्द्र श्रेष्ठपिंसं म्येँ न्यंकादीगु खः। ज्याझ्वलय् स्वीम्ह साहित्यकारपिंसं रचना पाठ यानादीगु खः ।
धेंधेंबल्लाखय् दुथ्याःपिं न्हूपिं च्वमिपिं मध्ये चिनाखँपाखे 'स्वर्ण इतिहास थौं च्वये' नांगु ज्ञानेन्द्र वज्राचार्यया चिनाखँ न्हाप, 'बुलुगु दृश्य अदृश्य पाल्चाय्' नांगु रश्मि नापित किपूया लिउ व 'नेपाः मां' नांगु राज्यरत्न बज्राचार्य किपूया चिनाखँ लियां लिउ लाःगु खः। अथेहे बाखं विधाय् 'जनताया प्याखं' बद्री बेदना न्हाप, 'पुनारांया चिउताः' नजरराम महर्जन लिउ व 'कपुत मखु सपुत' रामकृष्ण महर्जन लियां लिउ लाःगु दु। अथेहे च्वखँय् 'आधुनिकताया वा फसय् जि' सम्झना महर्जन न्हाप व 'न्हाय्कं' एन.आर.डी. किपू लियां लिउ लाःगु खः ।
नेवाः अग्राधिकार, नेवाः पहिचान व नेवाः राज्यया समर्थन यानाः न्ह्याःगु पीगुक्वःगु विराट सम्मेलनया न्हापांगु ज्याझ्वः मुक्कं भक्तपुर एफएमपाखें प्रत्यक्ष प्रशारण याःगु खः। थौं 'संघीय गणतान्त्रिक संविधान व नेवाःतय् सरोकार' विषयय् बिचाः गोष्ठी न्ह्यानाच्वंगु दु। बहनी सांस्कृतिक ज्याझ्वः नं दु। आकिवं दछियंकं विराटया लुँबुदिं न्यायेकेगु नं घोषणा याःगु खःसा विराटया गुथिछेँ धस्वाकेत थीथी दातापाखें ग्वाहालि नं मुंकूगु खः। ज्याझ्वलय् ग्वाहालि पुचःया नायः कृष्णभक्त सुवालं लसकुस यानादीगु खः ।
