सरकार कामचलाउ जूसां बजेट हयेमाः

दलतय् असहमतिं सरकार दयेके मफयाच्वंगु कारणं यानाः देशं आः तक पूरक बजेट तकं हये मफयाच्वंगु दु। बजेट हयेगु सवालय् नं दलतय् दथुइ विवाद जुयाच्वंगु दु। थ्वहे झ्वलय् कार्तिकया न्हापांगु वाःपाखे बजेट हयेगु धकाः सरकारं यानाच्वंगु कुतः विशेष चर्चाया विषय जुयाच्वंगु दु। सरकारं आः न्ह्याथे यानाःसां बजेट हयेगु धकाः कुतः यानाच्वंगु दुसा माओवादीं कामचलाउ सरकारयात बजेट हयेके बी मखु धकाः अडान कयाच्वंगु दु। उखे मोहनिया बिदाबलय् तकं ज्या यानाः अर्थ मन्त्रालयं बजेट हे करिब करिब तयार यायेधुंकूगु दु। थज्याःगु अवस्थाय् बजेट हयेके बी मखु धइगु माओवादीया अडानयात मनूतय्सं मययेकीगु स्वाभाविक खः। उकिं सरकार गठन मजूगु खँयात त्वहः दयेकाः माओवादीं बजेट पनेगु उचित मजू। वर्तमान सरकार कामचलाउ सरकार ला खः, तर थ्व कामचलाउ जुयाच्वंगुया दोष सरकार स्वयम्या धाःसा मखु, उकिया छगू पक्षीय दोषी माओवादी स्वयम नं खः। माओवादीं न राष्ट्रिय सहमति दयेकेगु ज्या याये फत, न बहुमत हयाः सरकार गठन याये फत। न थम्हं सरकार गठन याये फत, न कर्पिंत सरकार गठन याके बिल। उकिया हे लिच्वः कथं देशय् कामचलाउ सरकार ताःई चले जुयाच्वंगु खः। थ्व सरकार अझ मेगु गुलि चले जुइ धाये फुगु अवस्था मदुनि। थ्व वास्तवय् विशेष परिस्थितिइ न्ह्यानाच्वंगु कामचलाउ सरकार खः। अय् जूगुलिं थ्व सरकारयात देय्या लागिं मजिमगाःगु ज्या यायेगुपाखें पनेगु पाय्छि जुइ मखु। उकिसनं देय्या अर्थतन्त्रय् लिच्वः लाकीगु बजेट हे पनेगु ला झन् हे पाय्छि ज्या मखु ।

More Stories Like this