संविधान दयेकेगु ज्यायात प्राथमिकता

सरकार गठनया ज्याय् व्यवधान वयाच्वंसां संविधान दयेकेगु ज्यायात लिच्वः मलाकेगु धकाः राजनीतिक दलत संविधान दयेकेगुपाखे नं लगे जुइगु धकाः छगू बिस्कं समिति हे दयेकाः ज्या शुरु याःगु तसकं लसकुस यायेबहः जू। थुकिया लागिं संविधानसभा व थ्व ज्याया पहल याःपिं सकसितं सुभाय् बी हे माः। थुकिं यानाः संविधान दयेकेगु ज्या नं इलय् सिधइगु खः ला धइगु छगू आशा बिउगु दु ।

सरकार दयेकेगु ज्यायात संविधान दयेकेगु ज्यालिसे मस्वायेगु हे पाय्छि जुइ। संविधान संविधानसभां दयेकीगु खः, सरकारं मखु। उकिं संविधान दयेकेत संविधानसभा दःसां गाः, सरकार दये हे माः धइगु मदु। तर विडम्बना छु जुल धायेबलय् संविधान दयेके धकाः वःपिं राजनीतिक पार्टीत थौं सरकार दयेकेगु ज्याय् वनाः तक्यनाच्वन। आः उकियात छखे तयाः संविधान दयेकेगु ज्याय् वयाच्वंगु गुलिखे मतभेदत चीकेगु लागिं बिस्कं समिति हे गठन जूगु दु। आः राजनीतिक पार्टीतय्सं उगु समितिइ वयाः थःपिनि मतभेदत चीकेगु ज्या यायेमाः। यदि अन नं अडान हे कयाच्वन धाःसा हानं नं संविधान दयेकेगु ज्यायात न्ह्यःने न्ह्याके फइ मखु। छुं जुयाः सुनां नं अडान त्वःतेगु अवस्था मवल धाःसा अज्याःगु मुद्दाय् जनमत संग्रह हे यायेगु ज्या जुइमाः। निर्णय हे मयासे ताःहाकः अनिर्णयया बन्दी जुयाच्वनेगु पलेसा जनमत संग्रहलय् वन धाःसा उकिं अप्वः फाइदा जुइ। लिसें थ्व दलतय् लोकतान्त्रिक विधि नं खः। आःयात राजनीतिक पार्टी व उकिया दलतय्सं सरकार दयेकेगु ज्यायात स्वयां थुकियात प्राथमिकता बियाः वंसा बांलाइ ।

More Stories Like this