विष्णु सिनावन मखु सदांया निंतिं म्वाना वन

ह्दयप्रसाद मिश्र

सक्वया महाद्यः ध्वाखा साल्खा त्वालय् २०२७ साल पौष ९ गते कुन्हु भाजु नारायण प्रसाद श्रेष्ठ व मय्जु विष्णुदेवीया छेँय् छम्ह बहुमुखी प्रतिभाशाली मचाया जन्म जुल। गुम्ह मचायात म्हसिउ तासिउपिं सकसिनं 'विष्णु' नामं संवोधन यात। गरिब किसान परिवारय् जन्म जूम्ह उम्ह मचा ध्याचःया दथुइ पलेस्वां ह्वइ थें जुल। न्ह्यदँ दुबलय् निसें हे म्येँ हालेगु याःम्ह उम्ह मचां थम्हं ब्वनागु भाग्योदय स्कुलय् न्ह्यसःलिसः कासाय् न्यंगु छगू न्ह्यसःया लिसः नेपालभाषां बिउगु हुनिं मास्टरया दागाः तकं नयेमाल। स्कुलय् जिं छेँय् न्ववानागु खँ ल्हायेगु भाषं छाय् लिसः बी मजिउ? जिगु भाय् जक भाय् मखु ला धकाः मार्साबयात न्यंबलय् ध्वग्गीगु आलु धायेकाः स्कुलय् अपमानित तकं जुइमाल ।

गन लक्ष्मी दइ अन सरस्वती च्वनी मखु गन सरस्वती च्वनी अन लक्ष्मी दइ मखु धाःथें गरिबीया महासागरय् दुनाच्वंम्ह उम्ह मचाया जीवनय् गरिबीया च्वामुगु हतियारं सुत्तुंसुया हे जक च्वन। स्कुलय् नेवाः भाय् नं तयेमाः धकाः सः तःगु कारणं स्कुलय् बांमलाक्क तिरस्कृत जुइमाःगु जक मखु गिरिजाप्रसाद जोशीया "थ्व जीवन हे बरदान खः" धाःगु म्येँ साहित्य सम्मेलनय् हाःगु कारणं त्वाःबाहाःयापिनिपाखें नापं ग्वाय् मबूनिबलय् हे राजनीतिइ सं जुइम्ह मनू धकाः बांमलाक अपहेलित तकं जुइ माल। अय्नं व छुं हे पर्वाह मयासे न्ह्यज्याना हे च्वन। तर वयागु जीवनय् छगूयां लिपा मेगु वज्रपात वयां तुं च्वन। ०४५ सालय् भुखाय् ब्वयाः छेँ दुना वन। छेँय् दकलय् तःधीम्ह कायमचा जूगु व बौ याकःचिया किसानी ज्यां छेँय् च्वंपिनि प्वाः थने मफइगु खनाः उम्ह मचां निवाः तक खलासीया अनौपचारिक टेनिङ्ग कयाः भुइजःसि नारांद्यःया रूटय् चले जुइगु गाडीइ खलासीया ज्या यातं नं छक्वः गाडी हे पल्टे बिल। अनलिं ललितकला क्याम्पसय् ब्वँब्वं हे किपुली दराज दयेकेगु थासय् लेबर (ज्यामि) या ज्या यात। वयां लिपा पारस होटेलय् गोदाम किपरया ज्या याःबलय् अन जुयाच्वंगु अन्याय विरुद्ध सः तःगु कारणं ज्यां हे ल्हाः सिले माल। अय्नं वं हरेस मनः, ह्ष्टपुष्टगु म्ह, सदां मुसुक्क न्हिला पिज्वःगु ख्वाःपाः ज्वनाः निरन्तर उम्ह मचा न्ह्यज्याना हे च्वन। गबलें जनबहाया स्टिल भारा पसलय् ज्या यानाः जुइमा, गबलें एयरपोर्टय् प्लेनया सामान ल्ह्ययेगु लोडर ज्या यानाः जुइमा वं थःगु ब्वनेगु ज्या गुब्सं मत्वःतू ।

संगीत ख्यलय् नरराज ढकाल संगीता प्रधान, होमनाथ उपाध्याय, अच्युतराम भण्डारीपिनिपाखें क्लास कयाः न्ह्यज्याःम्ह बिष्णुं थःगु हे क्याम्पसया ज्याझ्वलय् थःहे संयोजक जुयाः ज्याझ्वः याःबलय् ज्याझ्वलय् वनेत बसभाडा मदयाः सक्वंनिसें येँय् तक न्यासि वयाः नं थःगु दायित्व पूवंकां तुं त्वःतल। कयौंक्वः येँनं सक्व व सक्वं येँ जुइत चुरोट छपु पासा कयाः न्यासि जुइत नं भ्याः भतिचा हे उसि मचाल। गुब्लें स्कुलय् म्युजिक टिचर जुयाः, गुब्लें होटेलय् म्येँ हालेगु यायां बसन्त श्रेष्ठपाखें नृत्य नं सयेकल। अले थःगु जन्मभूमियात सकस्यां म्हसीमा धकाः थःगु नां विष्णु श्रेष्ठ धायेगुया पलेसा 'विष्णु सक्व' धकाः च्वयाः नामय् हे सक्वया प्रतिनिधित्व याकल। थुकिं वया थःभाय् व जन्मभूमि प्रति गुलि प्रेम दु धयागु खँ अथें स्पष्ट जू। घडीया पेण्डुलम थें न्हिछिं मदिक्क उखेंथुखें ब्वांब्वां जुयाच्वंम्ह विष्णुया ०५० सालय् सक्वयाम्ह हे मिनु नांयाम्ह मिसानाप लभ म्यारिज जुल, वयापाखें काय् छम्ह म्ह्याय् छम्ह नं दत, तर न्यादँ लिपा ०५५ सालया वैशाख ८ गते गुब्लें मबायेगु बाचा याःम्ह मिनुं आकाझाकां थ्व संसार त्वःतावंगु वज्रपात नं विष्णुं लाचार जुयाः फये हे माल। अनंलि ०५७ सालया मंसीरय् जलविरेया सबीतानाप निक्वःगु लभ म्यारिज जुल, वयापाखें नं काय्मचा छम्ह दत। जीवनय् हाकनं छक्वः न्हूगु बसन्त वल ।

सदां न्हिउ ख्वाःम्ह व ख्याः यायेमाःम्ह विष्णुं छगू दर्जनं मल्याक थीथी सम्मेलन व संघसंस्था पाखें दसिपौ नं प्राप्त यात, म्येँ च्वयेगु व संगीत तयेगु जक मखु म्येँ हालेत नापं तयारम्ह विष्णुं ख्यालिजुजु मदनकृष्णंनिसें आपालं प्रतिष्ठित गायकपिंत नापं थःगु संगीतय् म्येँ हायेकाः छम्ह सफल संगीतकारया रुपय् थःत प्रतिस्थापन यात। देय्या निंतिं छुं न छुं यायेमाः धयागु विचारय् सदां विचारमग्न जुइम्ह विष्णुयात अझ नं छुं यायेमानि थें च्वन, अले स्फुर्ति नक्सां संकिपा ख्यःपाखे पलाः न्ह्यज्याकल। वया जीवनय् ०४७ सालंनिसें ०६४ सालतक तच्वकं हे उन्नति व प्रगतिया ई जुयाबिल। सरस्वती व लक्ष्मी छथासं च्वनी मखु धाइगु धापू नं थुगु इलय् गलत साबित जुया बिल। लक्ष्मीद्यः छेँय् च्वना बिल कि गरिबी व दरिद्रता अथें तना वनेयः खनिं। विष्णुया जीवनय् नं थथे हे जुल। अभाव समस्यात फुकं व खनाः ग्यानाः बिसिउँ वना बिल।
थःगु दिन भिना वःगु फुकं छिनावगु महसुस यानाःलि विष्णुं "माया रे रत्न" नांगु प्याखं दयेकेगु व उगु प्याखनय् नायक जुयाः कलाकारया रूपय् नं स्वकुमितय् न्ह्यःने विष्णु दं वल। वयां लिपा 'भिंतुना' प्याखंया प्यम्ह निर्माता मध्ये छम्ह विष्णु सक्व खःसा "लय" प्याखंया निर्माता जक मखु प्याखंया मू कलाकार (नायक) हे खः। "लय" प्याखं विष्णुया तच्वकं यःगु प्याखं जक मखु थ्व प्याखं वयागु हे जीवनया बाखंलिसे ज्वःलाःगु प्याखं नं जुया बिल। आत्मबल तच्वकं हे बल्लाःम्ह विष्णु सक्वं स्वला न्ह्यः तक थ्व च्वमिया न्ह्यःने थःगु स्वास्थ्य भचा ठीक जूसा हाकनं छगू बांलाःगु प्याखं दयेके तिनि धकाः थःगु इच्छा प्वंकूगु खः। ल्वगि जुयाः छेँय् वासः यानाच्वंगु इलय् नं वं तःपु हे चिनाखँ व म्येँ च्वःगु दु। विष्णु सक्व छम्ह तसकं बांलाःम्ह म्येँ च्वमि खः। गुकिया दसु "लय" प्याखंया थ्व म्ये खः -
"मतिनाया मिखा कनाः
जीवनयात स्वये
देशन्यंक झिलिमिलि
निभाः जुयाः त्वये"

निभाः जुयाः त्वये धाइम्ह विष्णु सक्व नेपालभाषा व नेपाली भाषाय् नापं द्वलंद्वः म्येय् संगीत बियाः व सलंसःपु म्ये च्वयाः धाथें हे निभाः जुयाः त्वयाच्वन। मदिक्क न्ह्यज्यानाच्वन। गन सुख दु अन दुःख नं दु, गन दुःख दु अन सुख नं दु धाःथें सफलतायात दास दयेकाः हर्ष व खुसिं न्ह्यज्यानाच्वंगु इलय् आकाझाकां थः अबु मदुगु वज्रपातयात नं वं सह मयासें मगात। बौ मदुसांनिसें विष्णुया जीवनय् दुःखया ग्रहणं बांमलाक ज्वनाहल। बौया दकिला हे सिधये मलाःनि बिष्णु थः हे थाइमाक्स धाःगु ल्वचं कयाः चातुवात। डाक्टरं विष्णुयात ०६५ या पुष महिना तकया डेट बिउगु खः। 'जितः यमराजं काःवये फइ मखु ह्दय सर, जि खन कि यमराज अथें ग्यानाः हे बिसिउँ वनी, उकिसनं थुज्वःगु ट्राफिक जामया समस्या दुगु देशय् यमराज जिथाय् याउँक थ्यंकः वये फइला? जिं स्वये ला फइ मखु का, सम्भव हे मदु' धकाः वास्याक्क न्हिउगु लु जिगु मिखाया न्ह्यःने आः नं लुयाच्वंगु दनि ।

नेपालभाषाया निंतिं छुं न छुं याना हे वनेगु प्रण याःम्ह विष्णुयात निर्दयी कालं २०६७ असोज २२ गते शुक्रवाः सुथय् ९ बजे बल्छिइ न्या क्यंके थें थःगु कालपासय् क्यंकाः यंका बिल। झी सकसितं मर्माहित यानाः कालं वयात यंकूसां विष्णु सक्व गुब्लें सी मखु। थौं झीगु न्ह्यःने वयागु भौतिक शरीर जक मदुगु खः व मदुगु मखु। उकिं विष्णु छ सित मखु छक्वः सिनाः सदांया निंतिं म्वात। छ निभाः जुयाः सदां त्वयाच्वने फयेमा । थ्वहे छ पासः श्रद्धाञ्जली छंत देछायाच्वना ।

More Stories Like this