विष्णु सक्व लुमंकेबलय्

विजयरत्न असंबरे

बिष्णु सक्वयात म्हसिउगु आपाः मदुनि। अथेहे १५/१६ दँ जक दत। अबलय् जि गुड नाइट एफ.एम.या नेपालभाषा ज्याझ्वः दुनेया छम्ह ज्याकःमि। अले नेपालभाषा एफ.एम. स्थापना यायेया सहयोगी नं खः जि। वहे ल्याखं छम्ह संगीतकःमि विष्णु सक्वलिसे म्हसीका जुल। तसकं न्ह्याइपुसे च्वंम्ह। ग्वारामारां च्वंम्ह बिष्णु सक्व स्वयेबलय् हे नुगलय् स्वां ह्वः। लिपा वनाः बिष्णु सक्वं छगू नेवाः संकिपा दयेकल। उगु संकिपाया नां "माया रे रत्न" खः। उकी विष्णु थः हे हिरो। थःहे डाइरेक्टर। थःहे संगीतकार नं। संगीत ला वय्कःया ख्यः हे जुल। खय्त ला "माया रे रत्न" उलि धिसिलाये मफुत। तर स्वकुमिया नुगः धाःसा त्याकां त्वःतल। थम्हं हे डाइरेक्सन यानागुलिं "माया रे रत्न" भतिचा फ्यासुल धइगु वाःचायेकाः बिष्णु सक्वं थःगु महत्वाकांक्षी संकिपाया रुपय् दयेकूगु "लय"या भाला आर्यम नकःमियात क्वबिकल। उलि जक मखुसे आर्यम नकःमिया हे छगू संकिपा "भिंतुना"या निर्माण ज्याय् लाय् तयाः ग्वाहालि नं यात। बिष्णु सक्वं थःगु लाय् साले खन वा मखन व ला मसिल ! तर झी दथुइ गबलें हुइ मफइगु छगू छाप धाःसा त्वःता वन ।

आर्यम नकःमिया डाइरेक्सनय् दयेकूगु "लय" पूवने न्ह्यः हे बिष्णु सक्वयात तच्वःगु ल्वचं कल। ल्वय्या हुनिं बिष्णु मेखे बिचाः याये मफुत। थःगु उसाँय्पाखे हे ध्यान तया च्वने माल। डाक्टरतसें आस मंत धकाः धया हल। तर बिष्णु सक्वं आस मत्वःतू। जीवनलिसे ल्वानां तुं च्वन। बाम्हय् कानाच्वंगु संकिपा "लय" पूवंकेत यक्व हे कुतः नं यात। आर्यम नकःमिं थुखेपाखे ग्वाहालि याना मबिल। हारे चायाः बिष्णुं मेपिं पासापिंके ग्वाहालि फ्वन। कलाकार सुशील राजोपाध्याय न्ह्यःने वल। वं ग्वाहालि यात। फिल्म एडिटर सोहन मानन्धरं ग्वाहालि यात ।

डाइरेक्सनया भाला कया तःम्ह आर्यमं मयाः। पासापिंसं आर्यमयात "लय" पूवंका बीया नितिं इनाप यात। वं थःज्यागु इनाप न्हाय्पं कुचां हे दुमछ्वः। थथे जीवन व मरणया लुखाखलुइ लानाच्वंम्ह बिष्णु सक्वयात ग्वाहालि यायेत जूसां "लय" पूवंका बीमाः धकाः इनाप याःबलय् आर्यम नकःमिं "छम्ह प्रोड्युसर सीन धकाः डाइरेक्टरं नं आत्महत्या यायेमाः धइगु मदु" धकाः लिसः बिउगु जितः आःतले लुमं। खय्त ला वय्कःया थ्व थःगु अधिकारया खँ खः। झीसं छुं धायेथाय् मदु। तर उलि ग्वाहालि याना बिउगु जूसा जिउ थें ताः। न्ह्यागु हे जूसां "लय" पिदन। संकिपा बांलाः हे धायेमाः। स्वकुमि दथुइ च्वनाः "लय" स्वयेगु इच्छा खः बिष्णु सक्वया। थगुने व इच्छा नं पूवंकल। थुकथं ज्वः मदुगु आत्मबल ज्वनाः ल्वय्लिसे ल्वानाः म्वाना वंम्ह बिष्णु सक्व नेवाः संगीत व संकिपा ख्यलय् न्ह्याबलें न्ह्याबलें म्वाना हे च्वनी ।

More Stories Like this