स्याक्व त्याक्व : सिका:भू यायेगु न्हि

आश्विन शुल्क प्रतिपदा निसें न्ह्याःगु मोहनि नखःया महानवमी कुन्हुया न्हि स्याक्व त्याक्व खः । थुगु न्हि कुन्हु द्यःद्यःपिन्त सिलाः वाः हुयाः यचुकाः पूजा याइ । बाँ स्याइपिं जूसा पूजा याःगु थासय् द्यःद्यः पिन्त दुगु, हेँय् आदि स्याइ ।

मोहनिवलय् प्रत्येक द्यःया मूर्तिइ धाःथेंयापिं द्यःद्यःपिं दुबिना च्वनीगु जूगुलिं थ्वकुन्हु द्यःयात बलि बिल धाःसा उम्ह प्राणी वा पशुया हानं पशु जन्म काये म्वाःलाः मोक्ष प्राप्त जुइगु जूगुलिं गुलि स्यात उलि हे मोक्ष जुइ धइगु विश्वास दु ।

नेवाःतय्सं विशेष यानाः भगवती, अजिमा, गणेद्यः, भिंद्यः आदियात बाँ स्यानाः पूजा याइगु खः । थुकथं हे नवमि कुन्हु थःथःगु छेँय् दुगु मोटर, मोटरसाइकल, कलकारखाना आदियात नं बाँ स्यायेगु याइ । थौं कन्हय् न्हापाया स्वयां बाँ स्यायेगु चलन म्हो जुयावनाच्वंगु दुसाः थुकीया पलेसाः मनूतय्सं खेँय् तयाः द्यः पुजा यायेगु यानाच्वंगु दु ।

थथे गन गन छेँय् बाँ स्यायेगु याइ अन बहनी सिका:भू धकाः थकालिनिसें स्याःम्ह प्राणीपिनिगु अङ्गया छसिकथं सी लःल्हाना बीगु चलन दु । छेँया दकलय् तःधिःकम्हसित स्याःगु प्राणीया जवगु मिखा, वयां झ्वलिक लिपा खवगु मिखा, जवगु न्हाय्पं, खवगु न्हाय्पं, म्ये जवगु न्हकु, खवगु न्हकु आदि लःल्हायेगु याइ ।

अथेहे हे स्याःगु प्राणी खा वा हेँय् जुसाः तःधिःकम्हसित छ्यं, वयां लिपा जवगु पपु, खवगु पपु, जवगु तुति, खवगु तुति, आदि झ्वलक लःल्हानाः सिका:भू बीगु चलन दु ।

More Stories Like this