'दलतय् खँ मिले जुइधुंकल'
नेपालय् सरकार दयेकीगु जानकारी अमेरिकी मन्त्रीयात
येँ (सन्ध्या टाइम्स)/नेपालय् गबलय् न्हूगु सरकार दयेकी धइगु खँ नेपाःमितय्सं ला आः तक मसिउनि तर नेपालं न्हय्गू समुद्र पारी च्वंगु देय् अमेरिकाय् च्वंम्ह छम्ह सहायक मन्त्रीं धाःसा सीधुंकल ।
दक्षिण तथा मध्य एशिया स्वइम्ह अमेरिकी सहायक मन्त्री रोबर्ट ब्लेकं बुधवाः समाचार संस्था एएफपीयात बियादीगु छगू संक्षिप्त अन्तर्वार्ताय् नेपालय् याकनं सरकार गठन जुइत्यंगु बारे थःत जानकारी वःगु खँ कनादीगु खः ।
वय्कलं नेपालय् याकनं न्हूगु सरकार गठन जुइगु खँय् थःपिं आशावादी जुयाच्वनागु दु धासें उकिया लागिं पहल जुयाच्वंगु बारे थःत जानकारी वःगु खँ नं कनादीगु खः।
सरकार थुबलय् हे गठन जुइ धइगु खँ थम्हं धाये मफु तर थ्वहे इलय् सरकार गठनया ज्याय् छुं प्रगति धाःसा जुइधुंकूगु जानकारी थःत वःगु खँ नं वय्कलं कनादीगु दु।
न्हूम्ह प्रधानमन्त्री ल्ययेगु लागिं झिंनिक्वः तक जूगु चुनाव असफल जुइधुंकाः थज्याःगु प्रगति जूगु संकेत वय्कलं बियादीगु खः ।
वय्कलं याकनं हे न्हूगु सरकार गठन जुयाः न्हूगु संविधान दयेकेगु व माओवादी छापामारया समायोजन यायेगु ज्या न्ह्याइ धइगु खँय् थःपिं आशावादी जुयाच्वनागु खँ नं धयादीगु दु। वय्कलं नेपालं फये मालाच्वंगु सीमा विवाद सम्बन्धी समस्या ज्यंकेत छम्ह ग्वाहालिया रुपय् ज्या यायेत थः इच्छुक दुगु खँ नं धयादीगु दु। वय्कलं नेपाःया सीमा समस्याया विस्तृत व्याख्या धाःसा यानामदी ।
नेपालय् याकनं सरकार गठन जुइ धाःसां गुगु पार्टीया सु नेताया नेतृत्वय् गठन जुइ धइगु खँ नं कनामदी। दलतय् दथुया मतभिन्नता म्हो जुया वंगु कारणं सरकार गठन यायेत वय्कःपिं ताःलाइ धकाः जक वय्कलं धयादीगु दु ।
थनिं प्यदँ न्ह्यः माओवादीयात ल्वाभः त्वःतकाः खुल्ला राजनीतिइ हयेगु ज्याय् थीथी विदेशी कुटनीतिक नियोगया नापं अमेरिकाया नापं ग्वाहालि दुगु खः ।
