मोहनि व गैर हिन्दू नेपाःमिया मनःस्थिति

थुगुसी नं दँय्दसं थें मोहनि नखः तःजिक न्यायेकेत सकलें तयार जुइधुंकल। तर मोहनि नखःया खँ वइबलय् थुकिया नापनापं धर्मया विवाद वइगु धाःसा अझ नं कायम हे तिनि। मोहनि नखःयात हिन्दू मात्रया तःधंगु नखः धाइ, उकिं नेपाः न्हापा हिन्दू राष्ट्र जुयाच्वंगु इलय् थुकियात राज्यं हे विशेष रुपं हनेगु याना वयाच्वंगु खः। तर आः नेपाः धर्म निरपेक्ष राज्य जुइधुंकूगु कारणं थुकियात न्हापा थें राज्यं हे विशेष रुपं हनेगु आवश्यकता दु ला धकाः न्ह्यसः पिहां वइगु स्वाभाविक खः। मोहनि नखःयात राज्यं तःन्हु तक बिदा बी, टेलिकमं मोहनिया हे लसताय् मोबाइलय् छुटया सुविधा बी, सरकारी ज्याकुथी मोहनि नखःया हे पेन्सन बी। थ्व वास्तवय् मोहनियात राज्यं अझ नं मान्यता बियाच्वंगुया हे दसि खः। संविधानय् धर्म निरपेक्ष धायेधुंकाः कम से कम नं राज्यं धर्म निरपेक्ष व्यवहार यायेमाःगु खः। तर मोहनिया हकय् अज्याःगु व्यवहार राज्यं मयाः। वास्तवय् मोहनि वल कि थ्व देशय् च्वंपिं मेमेगु धर्मावलम्बीया मनूत वाताहां च्वनेमाःगु अवस्था दु। इसाई, इस्लाम, जैन आदि धर्म माने याइपिं नेपाली नागरिकं मोहनिया इलय् थःपिंत निरीह व अनागरिक तायेकेमाःगु बाध्यता थौंया लोकतान्त्रिक धर्म निरपेक्ष नेपालय् नं कायम हे जुयाच्वन तिनि ।

राज्य जक मखु, देशय् जिमिसं यानाः धर्म निरपेक्षता घोषणा जूगु खः धकाः दावी याइपि राजनीतिक पार्टीतय्सं नं मोहनिया हे लसताय् चियापान ज्याझ्वःत यानाः थःगु हे पार्टीया गैरहिन्दू कार्यकर्ताया अपमान यानाच्वंगु खने दइ। थज्याःगु संवेदनशील सवालयात राज्य, राजनीतिक दल व सचेत नागरिक समाजं चिउताः तये हे माःगु खनेदु ।

More Stories Like this