'येँ स्वयां पिनेया नेवाःतय्त थुइके अःपु'

नेवाः देय् दबूया नायः नरेश ताम्राकारं संघीयता व नेवाः स्वायत्त राज्यया बारे येँया स्वयां पिनेया जिल्लाय् च्वंपिं नेवाःतय्त ध्वाथुकेत अःपुगु खँ धयादीगु दु । वय्कलं येँ नं पिने छुं नं ज्याझ्वः यायेगु इलय् आपालं नेवाःतय्सं ब्वति काइगु खःसां येँ जुइगु ज्याझ्वःलय् म्हो जक मनूतय्सं ब्वति कयाच्वंगु धयादिल ।

जातीय भेदभाव विरुद्ध राष्ट्रिय मञ्च व नेवाः देय् दबूया ग्वासलय् बुधवाः जूगु 'संघीयता व प्रस्तावित नेवाः स्वायत्त राज्य'या बारे सहलह ज्याझ्वलय् थीथी ख्यःया नेवाः विज्ञतय्सं थःथःगु बिचाः जक प्वंकाः उकीया लिसः न्यनाः मवंगु प्रति असन्तुष्टि प्वंकूसें देय् दबूया नायः ताम्राकारं थंज्याःगु बिचाः प्वंकादीगु खः ।

ज्याझ्वः नेवाः स्वायत्त राज्यया बारे थीथी ख्यःया नेवाः विज्ञतय्के दुगु भ्रम चीकेगु निंतिं ग्वसाःग्वःगु जुसां विज्ञतय्सं थःथःगु बिचाः जक प्वंकाः लिहांवंगुलिं वय्कपिनिगु भ्रमयात न्हंकेगु ज्या यायेमफुगु खँ ग्वसाःखलकं धाःगु दु ।

थ्वस्वाः न्ह्यः ज्याझ्वलय् जलस्रोतविद्ध रत्न संसार श्रेष्ठ, अधिकारकर्मी कपिल श्रेष्ठ, अधिवक्ता रामप्रसाद श्रेष्ठ, साप नेपालया नायः डा. रोहित नेपाली, नागरिक समाजया वसन्त रञ्जित्कार, मिसा अधिकारकर्मिपिं इन्दु तुलाधर व मोहिनी महर्जन, सभासद् मंगलसिद्धि मानन्धर व भिक्षु आनन्दं थःथःगु बिचाः प्वंकादीगु खः ।

अथेहे नेपाः राष्ट्रिय पार्टीया नायः डा. केशवमान शाक्य, एमाले नेता राजेन्द्र श्रेष्ठ, नेवाः देय् दबूया संरक्षक मल्ल के. सुन्दर, राष्ट्रिय योजना आयोगया पुलाम्ह दुजः डा. पुष्पराज राजकनिकार लगायतं नं संघीयता व नेवाः स्वायत्त राज्यया बारे नुगः खँ तयादीगु खः ।

More Stories Like this