भारतीय माओवादीयात नेपालय् तालिमया खँ

नेपालय् माओवादीं राष्ट्रियताया आन्दोलन धकाः थाय्थासय् भारत विरोधी गतिविधित न्ह्याकाच्वंगु इलय् लाक्क उकियात लिसः बी कथं भारतं पिहां वइगु छगू अंग्रेजी न्हिपतिं नेपाःया माओवादीतय्सं भारतया माओवादीयात थःगु देशय् तयाः गुरिल्ला तालिम बियाच्वन धकाः समाचार च्वयाहःगु दु। भारतयात उगु समाचारं यानाः नेपालय् खलबल शुरु जूगु दु। वास्तवय् भारतीय सञ्चार माध्यमं च्वयाहःगु अज्याःगु खँ नेपाःया माओवादीं न्ह्याकाच्वंगु भारत विरोधी ज्याखँयात बियाहःगु छगू प्रायोजित काउण्टर जक खः धइगु खँ अथें नं सीदु दु। अथे खःसां नं ल्वाभः त्वःताः शान्ति प्रक्रियाय् वयाच्वंगु माओवादीयात अज्याःगु द्वपं बीबलय् उकिं मेमेगु थासय् नं लिच्वः लाकः वनीगु खँयात ल्वःमंके मजिउ। देशय् वहालवाला सरकारं राजीनामा बिउगु सछिन्हु पूवनेधुंकाः नं न्हूगु सरकार गठन याये फयाच्वंगु मदुनि। थ्व इलय् बहुमतीय मखुसें सहमतीय आधारय् सरकार दयेकेमाः धकाः खँ पिहां वयाच्वंगु दुसा भारतं बियाहःगु थ्व लिसलं माओवादीयात सरकारय् यंकेत भारत अझ नं तयार मदुनि धइगु खँ थुकिं क्यना बिउगु दु। अथे हे देशय् सेना समायोजनया ज्या न्ह्यायेत्यंगु दु। उकी माओवादी लडाकुयात नेपाली सेनाय् समायोजन यायेमाः धइगु नं खँ वयाच्वंगु दु। लडाकुयात सेनाय् यंकेत भारत तयार मदु धइगु खँया आभास नं उगु समाचारं बियाच्वंगु दु। भारतं नेपाःया माओवादीयात थ्वहे सन्देश बीगु लागिं अज्याःगु समाचार प्रवाहित याःगु खः। उकी शंका मदु। उकिया अर्थ नेपालय् शान्ति कायम यायेत भारत तयार मदुनि धइगु हे संकेत बिउगु खः ।

More Stories Like this