कांग्रेसपाखें जनमत संग्रहया प्रस्ताव
न्हय्लात्या दुने संविधान च्वयेगु कांग्रेस व एमालेया प्रतिवद्धता
येँ (सन्ध्या टाइम्स)/नेपाली कांग्रेसं आः नेपालय् लोकतान्त्रिक संविधान दयेकेगु लाकि जनवादी संविधान दयेकेगु धइगु खँय् जनमत संग्रह यायेमाःगु प्रस्ताव तःगु दु। कांग्रेस संसदीय दलया नेता नापं आः याकःचा प्रधानमन्त्रीया उम्मेदवार जुयाच्वनादीम्ह रामचन्द्र पौडेलं थौं थ्व प्रस्ताव तयादीगु खः ।
संविधान निर्माण सभासद दवाव अभियानं थौं सुथय् सिंहदरवारय् याःगु सहलह ज्याझ्वलय् न्ववासें पौडेलं आःया अवस्थाय् माओवादीं जनवादी संविधान दयेकेगु कुतः यानाच्वंगुलिं संविधान च्वयेगु ज्याय् पंगः ब्वलनाच्वंगु दावी यानादिल ।
उगु सहलह ज्याझ्वलय् कांग्रेस नेता पौडेलं कांग्रेसया कारणं संविधान निर्माण प्रक्रियाय् छुं हे कथंया पंगः जूगु मदु धासें संविधान च्वयेगु ज्याय् पंगः जुयाच्वंगु मू कारण धइगु हे एकीकृत माओवादी खः धकाः द्वपं नं बियादिल।
ज्याझ्वलय् न्ववानादीपिं वक्तात मध्ये कांग्रेस संसदीय दलया नेता रामचन्द्र पौडेल व एमालेया अध्यक्ष झलनाथ खनालं आः ल्यं दनिगु न्हय्लात्याया दुने न्हूगु संविधान च्वयेगु प्रतिबद्धता प्वंकादीगु खः। सहलहया लय् एमाले अध्यक्ष खनालं शान्ति प्रक्रिया व संविधान निर्माणयात नाप नापं यंकेमाःगु खँय् बः बियादिल ।
शान्ति, संविधान व सरकार गठनया निंतिं स्वंगू मूमू दलया दथुइ इच्छाशक्तिया आवश्यकता दु धासें वय्कलं दलत छप्पँ जूसा जक जनताया आक्रोश साम्य यायेफइ धयादिल। वय्कलं माओवादीलिसे जूगु स्वंगू बुँदाया सहमतियात कयाः शंका याये मजिउ धासें एमालें न्ह्यब्वःगु प्रस्तावय् सहलह जुयाः सहमति जुइगु दावी नं यानादिल ।
उगु ज्याझ्वलय् एकीकृत माओवादीया नेतातय्त नं सःतातःगु खःसां माओवादीया नेतात धाःसा सु हे उपस्थित मजू ।
एकीकृत माओवादी बाहेक एमाले, कांग्रेस नापं थीथी दलया युवा नेतात जानाः संविधान निर्माण सभासद दवाव अभियान गठन यानातःगु खःसा उगु अभियानपाखें मूमू राजनीतिक दल व संविधानसभाया अध्यक्ष सुवास चन्द्र नेम्वाङयात दबाव बीगु ज्या याना वयाच्वंगु दु ।
