मोहनिया लसताय् भिंतुना

कृष्ण प्रजापति

देश झन झन भज्यंक स्यना वनाच्वंगु दु। झिंनिक्वः तक मतदान जुयाः नं देशय् न्हूम्ह प्रधानमन्त्री ल्ययेगु थेंज्याःगु महत्वपूर्ण ज्याय् वर्तमान सदन ताःलाये फयाच्वंगु मदु। अथे जुयाः न्ह्यःने वयाच्वंगु मोहनि नं थुगुसी फ्यासुसे च्वनाच्वंगु दु। न्हूगु उत्साह, न्हूगु जोश व न्हूगु योजना ज्वनाः गांगामय् वनेमाःपिं सभासद् व सर्वसाधारण जनता मोहनि न्ह्यःने समाधानया उपाय मलुइगु खने दयेवं छझाः निराश जूवंगु दु। थुकी जरुर नं तःधंगु राजनीतिक दलया उलि हे तःधंगु भूमिका सुलाच्वंगु खँय् निगू मत दइ हे मखु। छगू ल्याखं माओवादीयात संसदीय व्यवस्थाय् फसे याये धुन धकाः नेपाली कांग्रेस, एमाले नापं तःधंगु राजनीतिक दलत छखे मख्ख जुयाः आत्मरत्ति यानाच्वंगु अवस्था दुसा मेखे थःपिं भ्वय् दुगु भलिं क्वथाय् हे प्रवेश जुइ धुनागु तायेकाः आः थःपिंसं धाःथें हे जक व्यवस्था चले जुइ मखुसा देश इकिधिकि नं चले जुइ मखु धइगु खँय् माओवादी नं दृढ हे जुयाच्वंगु दु। थथे तःधंगु राजनीतिक दलतय् दथुइ जुयाच्वंगु असमझदारीया कारणं थौं हाकनं छक्वः देश अन्यौलय् तक्यनाच्वंगु स्थिति दु। थुकियात समाधान यायेगु खःसा तःधंगु राजनीतिक दलत थवंथः मिले मजुसे जिउ हे मजिउनि ।

तःधंगु राजनीतिक पार्टीतय्सं नेपालय् वःगु राजनीतिक परिवर्तनयात विश्वय् हे वःगु अद्वितीय व ऐतिहासिक राजनीतिक परिवर्तन कथं कयाच्वंगु दु। तर आः वयाः झिंनिक्वः तक सदनय् चुनाव यानाः नं सुं नं उम्मेदवार निर्वाचित जुइ मफुगु स्वयेबलय् थज्याःगु परिपाटीइ नं विश्वय् हे अद्वितीय परिणति जुइगु खःला धइगु सम्भावना खने दयावःगु दु। खास यानाः राजनीतिक दलया नेतातय्गु कारणं हे थौं देश लिउने लाःगु खः। शुरुं ला माओवादी व कांग्रेस मिले जुयाः नं एमालेया अध्यक्ष झलनाथ खनालयात बहुमतं देशया न्हूम्ह प्रधानमन्त्री कथं ल्ययेगु प्रस्ताव जूगु खः। तर सदन चले जुयाःलि थः साधारण बहुमतं मखु कि सहमतिया आधारय् एमालेया बहुमत दइगु जूसा जक प्रधानमन्त्री जुइगु, मखुसा जुइ चाहे मजू धइगु कथं झलनाथ खनालं सदनय् ४०१ मत मवइगु जुइवं साधारण बहुमत वइगु ग्यारेन्टी दुसां झलनाथया उम्मेदवारी लित कायेत एमालेया प्रस्तावक वर्तमान प्रधानमन्त्री माधव नेपालं सभामुख समक्ष प्रस्ताव तयेवं देशया न्हूम्ह प्रधानमन्त्री ल्ययेगु ज्या स्वतुमतु स्वयावंगु खः। अथे जुयाः नं आः तक नं देशय् न्हूम्ह प्रधानमन्त्री ल्यये मफयाः स्वला प्यला तकं देश अनिर्णयया बन्दी जुयाच्वनेमाःगु स्थितिइ थ्यनाच्वंगु दु।
राज्य पुनर्संरचना, सेना समायोजन नापं महत्वपूर्ण ज्यात ल्यनाच्वंगुलिं यानाः न्हूगु संविधान च्वयेगु ज्या ८० प्रतिशत सिधल, ९० प्रतिशत हे क्वचाल धाःसां तबि नं नेपाली जनता विश्वस्त जुइ फयाच्वंगु स्थिति मदुनि। नेपाली जनताया लागिं ला न्हूगु संविधान घोषणा यानाः पित महतलेया लागिं छुं हे ज्या मजूगु सरह हे खः। वास्तवय् जनताया जीवनय् हिउपाः हइकथं शान्ति सुरक्षा कायम याये मफुतले थन अप्वयाच्वंगु भ्रष्टाचार नियन्त्रण याये मफुतले अले स्वच्छ सुन्दर सफा नगर व गांया परिकल्पना पूवंके मफुतलेया लागिं देशय् वःगु राजनीतिक परिवर्तनया छुं नं अर्थ दइ मखु। बेसाःभाः झन झन थहां वनाच्वंगु व थज्याःगु इलय् हे देशय् हिन्दू मात्रया तःधंगु नखः मोहनि न्ह्यःने वयाच्वंगुलिं मेपिंत मखुसां न्हि खानाः न्हिं नयेमाःपिं गरीब जनताया लागिं पूर्ण रुपं हे दशा वयाच्वंगु महसुस जुयावःगु दु। यदि थन क्वातुम्ह सरकार कायम जुयाः उपभोग्य वस्तुतय्गु मू दंकाः सर्वसाधारण जनतां न्याये फइगु भाः तयाः मीगु बन्दोबस्त यायेफुगु जूसा थन गणतन्त्र, समाजवाद, साम्यवाद व थीथी वाद उपवादया नारा स्वयां जनतां तुरुन्त राहत चूलाकाः थ्व सरकारयात सुभाय् देछाइगु खइ। तर सरकार हे मदयाच्वंगु थ्व देशय् आः न्हूदँ व मोहनिया भिंतुना देछायेगु व भिंगु ज्याया निंतिं कामना यायेगु अवसरं बञ्चित जुइ मालाच्वंगु दु। थनया अर्थशास्त्रीतय्गु कमी कमजोरीया कारणं नं झीगु देशं पिने यंकीबलय् दंक व सुलभ ढंगं माल सामान यंकीगु अले पिनं हयेगु इलय् थिके यानाः व आपालं भन्सार पुलाः नं सुलभ मजुइगु ढंगं सामग्रीत दुत हयेमाःगु स्थिति जुयाच्वंगु दु। अज्याःगु स्थितिया अन्त्य यायेमाः ।

अर्थशास्त्रय् दलाल पूँजीपति वर्गं विदेशीं ध्यबा बीवं न्ह्यागु नं यायेत तयार जुयाच्वनी। झीगु देशय् नं थौं अज्याःगु हे हविगत ब्वलनाच्वंगु दु। विदेशं थीथी एनजीओ आइएनजीओया नामय् ध्यबा बीवं हे थन थीथी कथंया नारा व अनुपयुक्त प्रचार प्रसार यानाः नं राजनीतिक दलतय्त क्वह्यंकेगु कथं सिद्धान्तहीन राजनीतिया शुरुवात जुया वयाच्वंगु खनेदु। अमेरिकी साम्राज्यवाद व भारतीय विस्तारवादं चाहे जू थें चले जुयाच्वनीपिं झी राजनेतात आपालं दु। उमिगु तप्यंक नां काये मजिउसां झी तःधंगु पार्टी दुने हे अज्याःपिं दलालत सुलाच्वंगु दु धायेत छुं लिस्वयेमाःगु आवश्यकता मदु। इलय् ब्यलय् उमिसं थःगु चरित्र चरितार्थ याना च्वंगु नं दु। उकिया बापत उमित जग्गा जमीन, छेँ आदि बक्सिस नं वयाच्वंगु दु। थ्व ल्याखं झीगु देशय् छपलाः छपलाः यायां थनया नेतातय्त व युवा पुस्तायात भ्रष्ट यानाः कन्हय् झीगु राष्ट्रियताय् हे हमला यानाः उकियात हे नष्ट याइगु नं सम्भावना दइ। न्ह्यःने वयाच्वंगु मोहनि व न्हूदँ ११३१ या लसताय् अज्याःगु बांमलाःगु परिपाटीं बचे यायेत थ्व देशया नेतात ताःलायेमाः धकाः कामना याये। देश स्यना वन, मखुगु थासय् लाःवन धाःसा नोक्सान जुइगु आखिर झीत हे खः ।

विदेशीं तःक्वःमछि हे झीगु देशय् थनया जनता गुलि राष्ट्रभक्त वा एकतावद्ध धइगु खँय् झीगु नाडी थियाः लना स्वयेधुंकूगु दु। महाकाली सन्धिया इलय्, नागरिकता विधेयक सदनं पारित याकाः थौं ल्ह्वये नं मजिउ फाये नं मजिउगु अवस्था लाकातःगु इलय् व आः नं थन विदेशं आपालं चलखेल याना हे च्वंगु दनि। थज्याःगु झंझटं मुक्त जुइत नं झीके राष्ट्रियताया भावना ब्वलंके माःगु स्थिति दु। म्हिगः तक छ्यं धस्वाका म्वानाच्वनापिं झी देशया सार्वभौम नागरिकत थीथी कारणं थौं अन्योलय् लानाच्वंगु दु। थ्व झीगु देशया विडम्वना धायेमाःगु स्थिति दु। उकिं पार तरे यायेगु खःसा राजनीतिक पार्टीया नेतातय्के न्हापां निःस्वार्थ व देशभक्तिया भावना ब्वलने माल। वयां लिपा उमिगु चरित्र त्याग व तपस्याया भावनायात मेपिसं कदर याइगु वातावरण ब्वलंकेमाल। मोहनिया थ्वहे भिंतुने ।

More Stories Like this